Durante temporada di COVID-19
Oranjestad – Diadomingo dia 29 di November 2020 a tuma lugar e prome edicion di e Kiwanis Ride4Kids Challenge. E actividad aki tabata un iniciativa di Kiwanis Club of Palm Beach Aruba pa recauda fondo pa duna aporte na nos communidad, especialmente na muchanan den nescesidad.
Aña 2020 a wordo grandemente afecta pa e Pandemia di Covid-19. Mayoria organizacionan voluntario na Aruba, incluyendo Kiwanis Palm Beach, mester a reinventa nan mes pa asina por sigui funciona y cumpli cu nan metanan proponi. E presidente actual, Richard Roy, no a hesita ningun momento y a instala un “Innovation Committee” bow di liderazgo di Distinguished President Michel Janssen y pone un reto nan dilanti: bin cu ideanan nobo pa recauda fondo pa asina e club por conta cu e medionan necesario pa sigui contribui na e comunidad pa medio di su proyectonan social, cu den gran parti ta enfoca ariba e bienestar di nos muchanan.
Kiwanis Ride4Kids Challenge tabata ensera un actividad di ciclismo unda dos miembro propio di e Club a accepta e hazaña pa pasa rond henter Aruba cu bicicleta, asina recaudando fondo pa cada Kilometer completa of cu donacion fiho. E miembro nan deportista ta alavez dos figura concoci den nos comunidad, esta Rothmar Coenraad y Theodore (Ted) Johnson. Finalmente, un di tres deportista miembro, Michel Janssen, a accepta e reto pa accompañan pa dos-tercera parti di e ruta.
E evento a cuminsa pa 5:00’or Diadomingo mainta cu Rothmar saliendo for di cercania di e Faro na Westpunt y Ted Johnson biniendo aserca na Neptali Henriquez Park. E ruta a sigi te cu e Faro na Seroe Colorado y for di anker na Grapefield San Nicolas Michel Janssen a accompaña nan. E trajectoria rond Aruba total lo a cubri un distancia di alrededor 80 kilometer. E prome horanan di e recorido a bai relativamente facil. Despues e cansancio a cuminsa afecta e deportistanan severamente. Tambe, tempo no a coopera cu yobida y biento fuerte rond Aruba. No obstante, e pensamento di e meta noble aki, pa recauda fondo pa nos muchanan, a haci cu nan a sigi e ruta. Esaki a hibanan pa Gold Mine Bushiribana y despues pa Westpunt y Malmok, y bek pa Neptali Henriquez Park, Oranjestad. Al final Rothmar Coenraad a cubri e distancia di 101.4 km den un tempo record di solamente 4 ora y 39 minuut, Ted Johnson a cubri 82.1 km, cu ta e vuelta rond Aruba, den 4 ora y 52 minuut y Michel Janssen a cubri un distancia di 48.9 km den 3 ora y 40 minuut .
Riba e mesun dia Kiwanis Palm Beach a inicia un otro proyecto pa recauda fondo. E actividad aki a encera e desmantelacion di un cantidad di pallet, cu e idea pa usa e palo nan aki pa traha baki di mata, cu nan nan turno lo wordo bendi pa recauda fondo. Den Cuadro di protocolnan di prevencion di Covid-19 e activada tuma lugar pafo, den aire liber, observando distanciamento social y haciendo uso di tapaboca. Na e actividad aki un grupo grandi di e miembrecia a assisti. Asina un grupo grandi di voluntarionan, cu nan hermentnan, a logra desmantela alrededor di 60 pallet den un solo mainta. Nos ta pidi pueblo di Aruba pa keda pendiente pa mas informacion di e proyecto aki.
Manera anteriormente menciona, e fondonan recauda lo wordo dedica na donacion of proyecto nan social den nos communicad cu enfoque riba muchanan den necesidad. Kiwanis Club of Palm Beach Aruba kier a tuma e oportunidad aki pa gradici tur esnan cu den un forma of otro a contribui na e Kiwanis Ride4Kids Challenge. Un gradicimento special ta bai na tur esnan cu a sponsor Ride4Kids Challenge cu un suma di placa. Alavez ta informa cu ainda ta posibel pa contribui cu bo donacion door di manda un email pa ride4kids@kiwanispalmbeach.com mencionando bo nomber y faam.
Kiwanis Club of Palm Beach Aruba a keda sumamente satisfecho cu e actividadnan. Riba e portrenan adhuntu por mira e deportistanan den accion y tambe e voluntarion cortando pallet. Mas ainda e miembrecia a keda contento cu a logra di recauda fondo den un forma responsabel y conforme e protocolnan di Covid-19.
Kiwanis Palm Beach ta pertenece na e organizacion global Kiwanis Internacional cu ta un instancia caritativa dedica na haci nos mundo mihor door di cambia un communidad pa medio di un mucha cada bez. Mas informacion por haya riba: www.facebook.com/kiwanispalmbeacharuba of nos pagina di web www.kiwanispalmbeach.com.
