Durante un rueda di prensa teni diabierna mainta hora di Aruba, Raymond Knops Staatssecretaris a dirigi su mes na e tres islanan Curacao, Aruba y Sint Maarten. Knops a asegura e islanan cu Hulanda ta sigui yuda y ta dispuesto pa inverti tambe pa asina crea un mihor perspectiva pa e pueblo.
Pa loke ta trata pais Aruba, Knops tabata hopi cla: Gobierno di Aruba a sa di cumpli cu tur condicion poni pa Hulanda. Hulanda ta reconoce e esfuerso haci door di Gobierno di Aruba. Knops a menciona tambe e problema real di Aruba, unda el’a accentua cu den e 8 añanan ( di Mike Eman) Aruba a crea masha hopi debe. Sinembargo e ta reconce cu e Gobierno actual a maneha e situacion na un forma “aardig”‘.
Knops ta sigui bisa cu e entidad cu nan kier pone y cu kier hinca Aruba aden, no ta pa nada otro cu facilidad. Ta mas facil pa deal cu un entidad y tin tur tres isla bao di un paraplu, enbes di tin varios paraplu. Pues, no ta manera cu na Aruba, algun persona ta trece dilanti cu ta pa mal gobernacion, corupcion, etc.etc.
Ademas, Knops a informa tambe cu den e entidad, contrario na loke a wordo informa prome, lo no consiti di tres Hulandes Europeo, pero lo pone tambe personanan di e islanan den dje. Tambe den raad van toezicht di e entidad.
Hulanda ta dispuesto pa haci e prestamonan, pero na mes momento Hulanda kier asegura cu den un futuro, ora algo asina por bolbe presenta, e islanan mester ta den capacidad pa nan mes por carga e peso y pasa dor di un proximo calamidad o crisis.
Finalmente Knops a bisa cu Hulanda lo bay mesa cu e islanan pa asina delibera y yega na acuerdo.
SOLO DI PUEBLO ta haya cu e resultado di e reunion di awe ta un faborabel pa tur tres isla, pasobra a logra cambia e postura instranigente di Hulanda pa uno mas suave cu lo bay mesa pa negocia. Mas cu claro cu e islanan no ta cla ainda, pero e futuro negosacionnan lo mester yega na acuerdonan mas faborabel.
Por tuma nota si, cu tur isla ta dispuesto pa haci cambio, bini cu reforme y cumpli cu condicionan di Hulanda, pero ta bay pa e forma di proceder unda tabata kier pa ‘teken bij het kruisje’, of di ”take it or leave it”.
