Korps Politie Aruba ta bolbe haci un yamada na doñonan di vehiculonan bandona den espacio publico pa tuma nan responsabilidad y retira nan auto prome cu dia 24 di september.
Korpschef Ramon Arnhem a indica cu e periodo di aviso ta yegando na su final. Doñonan ainda tin menos cu un siman pa actua boluntariamente. Despues di esaki, KPA y e instancianan envolvi lo pasa pa accion concreto contra vehiculonan bandona cu ainda ta para den e areanan identifica.
E accion ta cuminsa den Oranjestad, caminda durante e ultimo periodo diferente vehiculo bandona a wordo identifica banda di caminda y den espacio publico.
Segun Arnhem, e mensahe na doñonan ta simpel: no warda te ora Polis mester interveni.
“Nos ta duna doñonan e oportunidad pa nan mes retira nan vehiculo. Si ta bo auto, tuma bo responsabilidad. For di 24 di september nos ta pasa pa accion,” Korpschef Arnhem a enfatisa.
For di aviso pa accion
E dianan cu ta resta ta brinda doñonan un ultimo oportunidad pa evita cu nan vehiculo mester ta retira door di autoridadnan.
For di 24 di september, vehiculonan bandona cu ainda ta den e area lo ta atendi como parti di e accion. E autonan identifica por ta hiba, mientras cu tur gasto relaciona cu retiro y e proceso lo ta core riba cuenta di e doño di e vehiculo.
Arnhem ta enfatisa cu e iniciativa no ta simplemente un accion di un dia. E meta ta manda un señal cla cu espacio publico mester ta manteni limpi, ordena y sigur y cu vehiculonan no por keda bandona indefinidamente banda di caminda.
KPA p’esey ta apela un biaha mas na cooperacion di doñonan: actua awor, prome cu e periodo di aviso caba.
E accion concreto ta cuminsa 24 di september den Oranjestad, y e intencion ta pa posteriormente sigui atende e problema den otro areanan di Aruba.
“Laga no yega asina leu. Hunto nos por percura pa un Aruba limpi, ordena y sigur.”
