Awe nochi henter pueblo di Aruba por disfruta di concierto di KrossHart y Izaline Calister via Pay Per View
Ayera nochi a tuma lugar e promer, di dos concierto di e tan spera presentacion di e agrupacion musical KrossHart huntu cu Izaline Calister.
E anochi a cuminsa cu un documentario di KrossHart unda publico por a experencia nan trayectoria di graba nan album Xplora na comienso di e pandemia na Alemania, y siña conoce mas di nan estilo y forma di crea musica cual ta consisti di melodianan local y Caribense mezcla cu ritmonan internacional di jazz y diferente otro genero.
Despues di e documentario e promer parti di e anochi a consisti di musica di KrossHart su album y a continua pa e presentacion di Izaline Calister cu a deleita e audiencia cu e popular cancionan manera: Anducuri cu ta e cancion di KrossHart interpreta pa e artista, Wowo’i Kariño, Yelele, Mi Pais y mucho mas cu a pone publico di pia cu canto y baile. Tambe publico a gosa di baile cu a acompaña e cancionan durante e evento, presenta pa Club di Movimiento.
Awe nochi lo continua e di dos concierto, y pa motibo di demanda grandi y mirando cu tur dos anochi a tabata “sold out” KrossHart a traha huntu cu Tele Aruba pa ofrece e concierto via Pay Per View via e plataforma di Tele Aruba awe nochi 7:00 PM pa unicamente $20.00
KrossHart kier a tuma e oportunidad aki pa gradici su patrocinadornan cu a hasi e evento aki posibel, un danki di curason ta bai pa Prins Bernhard Cultuurfonds, Unoca,y Departamento di Cultura cu semper a kere den e vision y a apoya KrossHart. Y tambe Caribbean Mercantile Bank, Aruba Tourism Authority, Setar, Renaissance, Thrifty Car Rental, Ocean Z y Subway pa nan aporte den hasi e conciertonan.
