La Cabana Beach Resort & Casino a host un bunita evento pa celebra Dia di Tata yena cu diferente sorpresa special, y actividadnan divertido na honor di e tatanan di e resort.
E team di Food & Beverage a sirbi premium snacks, cual a haci esaki mas special ainda unda tur hende por a disfruta di un tremendo experiencia culinario.
Como un toke di aprecio, tur tata presente a haya un regalo, cual tabata entre otro algun weekend stay y certificadonan, spa treatments y hopi mas. Locual a resalta di e evento tabata e reconocemento di ‘Tata di Aña’ cual e popular Tony Semeleer a ricibi, y kende sigur a accepta esaki cu mil amor. E ta un reconocemento bon mereci pa su dedicacion na trabao y su nivel di compromiso na La Cabana su famia, naturalmente tambe na su propio estimado famia na cas.
Pa engrandece e ambiente festivo, cantante Karena a pone ambiente y lanta henter e celebracion. Su melodianan captivante y fabuloso show sigur a haci e experiencia uno mas memorabel y dushi pa tur presente.
E evento aki pa celebra Dia di Tata cu empleadonan y tatanan na e resort tabata un tremendo exito. E tabata un oportunidad pa asina por honra y mustra aprecio na individuonan cu ta remarcabel, y cu ta traha asina duro manera profesionalnan, na mes momento siendo e ‘backbone’ di famianan riba nos isla.
E evento a ricibi un organisacion perfecto pa medio di Comision Social, y Departamento di Recurso Humano den colaboracion cu varios otro cu a contribui den haci e celebracion pa dia di tata aki uno divertido.
