Documentonan nobo cu a sali na superfici’e ta mustra cosnan masha mahos atrobe di Patrick Paskel, cu atrobe ta envolve den mas cobransanan for di fundacionnan di Gobierno. Den e mas reciente documento cu a yega ayera cerca Solo di Pueblo, por mira con Patrick Paskel cu su socio Nelson Andrade, ta cobrando sumanan gigantesco for di placa di deporte, den e caso aki for di Lotto pa Deporte.
Tabata dos siman pasa, cu nos a trece dilanti, con Patrick Paskel ta rancando placa di Arubaanse Voetbol Bond AVB, unda e ta cobrando mas di 6 mil florin pa luna, sin haci net nada! Pues ta enrikese su mes cu placa cu ta concerni Clubnan di Futbol di Aruba.
Den e prueba cu nos tin awe, por mira atrobe, con na un manera sin ningun gevoel, e dos personanan aki, conoci como e doñonnan nobo di AVP, ta sigui ranca placa na un manera sin ningun tipo di berguenza.
Kico nan a haci cu por a costa 175 mil den tres luna? Aki nos por mira cu placa di deporte ta wordo ranca y hinca den saco di Patrick Paskel atrobe sin gevoel, sin berouw.
Patrick Paskel a susha su mannan cu placa di pueblo, unda el’a cobra miles y miles di florin for di tur minister di AVP, for di Elmar, WEB, Utilities, cobra masha hopi placa den RDA y awor ta bin resulta tambe cu e ta cobra den Lotto pa Deporte.
E mes un Patrick Paskel aki, tur merdia ta lastra Endy Croes y Edmond Croes relaciona cu Lotto sin nigun base, pero riba su propio placanan cu e ta cobrando na forma ilegal, y sin traha pe, su boca ta cera, ‘keto keto’.
Ta bira ora cu e gobierno nobo mester bay cuminza un investigacion den Lotto pa Deporte, for di 2010 pa 2021 pa asina scrutina ta cuanto miyon Patrick Paskel a cobra of compinchinan di e Partido AVP.
