Laga e pas di Cristo goberna den boso curason,pa cual boso a wordo yama den un curpa, y sea agradecido. Laga e palabra di Cristo biba ricamente den boso,cu tur sabiduria,sinjando,y spiertando otro cu salmo y himno y cantica spiritual,cantando cu gradicimento den boso curason na Dios.
Y tur loke boso haci cu palabra of cu hecho haci tur den e nomber di Senjor Hesus, dunando gradicimento door di dj’E na Dios e Tata.( Colosensenan 3:15-17).
Nos tur ta na haltura cu locual ta goberna bo mente y bo curason, ta goberna bo bida.
No ta un tipo di adiccion so ta existi, pasobra tin hopi cos cu nos ta duna prioridad den nos bida, cu sin ripara nan ta bay cohiendo e lugar di Dios den nos bida, y poco poco hende ta bay fria pa e cosnan di Dios y habri e porta pa cosnan di mundo goberna.
Den 2 Timoteo 3:1-9 Apostol Pablo ta adverti Timoteo, pero awendia esaki a bira un les pa nos, pasobra di berdad nos ta mira locual a wordo bisa miles di anja pasa cohe un forma hopi serio riba mundo.Tur locual Pablo ta bisa di e cambio di karakter di hende a bira realidad,
Nos tin un tipo di hende moderno cu ta profesa , pero no ta confesa, hende cu ta biba artificialmente, cu ta bisa cu nan ta pertenece na Dios, pero nan curason ta leu for di Dios, pasobra nunca nan a kere den nan curason y confesa cu nan boca cu Cristo Hesus ta Senjor y cu Dios a lante for di mortonan pa nan ta salba. Esey ta cla para cirbi den locual Pablo ta bisa Timoteo.
Rebeldia a lanta contra e palabra di Dios, y hende ta laga sistema di mundo goberna nan bida, enbes di duna Cristo e prome lugar.
Bida awendia ta wordo goberna door di socialmedia, door di internet, y e palabra di Dios cual ta duna bida a wordo poni un banda,
No sea conforme na e mundo aki,ma sea transforma pa medio di e renobamento di boso mente, pa boso por comproba kico ta e bon y agradabel, y perfecto boluntad di Dios.( Romanonan 12:2).
Cristo Hesus ta e gran berdad pa nos pasobra solamente E por bisa bin serca Mi tur cu ta cansa y carga y lo mi duna boso sosiego.
Den Juan 14:1-4 Cristo Hesus ta duna e garantia cu e ta bin busaca tur esnan cu ta kere den dj’E pa caminda E ta nos tambe por ta, pa nos no tene miedo y no laga nos curason bira intrankil, pa nos kere den Dios y tambe den dj’E.
E a bisa Ami ta e caminda , y e berdad y e bida. Ni un hende no ta bin serca e Tata sino ta pa medio di Mi.
Nos tin di tene bon cuenta kico nos ta permiti goberna nos bida, pasobra bruheria y bagamunderia, maldad y malicia ta aumentando cada dia y diabel ta disfrasa na tur cos , pa e mantene hende den scuridad.
Pero tin un versiculo di liberacion pa cada ken cu a wordo ganja door di diabel, y a cay den su trampa, e palabra di Dios ta bisa : Cu si nos confesa nos picanan E ta fiel y husto di pordona nos nos picanan y pa limpia nos di tur inhusticia.
No tin nada cu diabel por mara bo pia den dje, cu Cristo Hesus no tin poder pa libera,no tin situacion cu bo por hanja bo aden cu Cristo Hesus no por sacabo.
Sinceramente , Pastor Marcel Balootje
