Nos ta bibando den dianan di promesa, promesa aki, promesa aya, promesa tur caminda,

Promesa cu ta parce berdad, pero semper promesa di hende por cambia, pero promesa di Dios no ta cambia.Hende semper lo keda culpa otro, y tin hopi factor cu ta pone cu promesa di hende no por wordo cumpli cune.

Pero ningun promesa cu Cristo Hesus a haci na nos no ta cambia, pasobra promesa di Dios ta si y amen.Locual ta para scirbi no ta cambia, pasobra Dios no ta gaña, cielo y tera por pasa mas Su palabra lo no pasa. Cristo Hesus semper a papia locual su Tata kende a mande a bise pa papia.

! Den Juan 14:1-3 ta para scirbi lo siguiente: No laga boso curason bira intrankil,kere den Dios,kere tambe den Mi. Den cas di Mi Tata tin hopi luga di biba, si no tabata asina, lo Mi a bisa boso, pasobra Mi ta bay pa prepara un luga pa boso,y ora Mi bay y prepara un luga pa boso,lo Mi bin atrobe, y ricibi boso serca Mi, pa caminda Ami ta, boso tambe por ta,Y boso sa na unda mi ta bay,y e caminda boso sa.

Tur caminda nos ta tende di plan 2030, y cu New World Order, y hopi plan di gera y destruccion, plan pa aumenta inmoralidad, plan di dictatura, plan pa bruha mente di nos muchanan, plan pa baha poblacion di mundo, plan pa traha mas virus manera Covid, pa asina tuma control di mundo.

Pero tur hende tin cu nota cu tur e plannan aki ta plan di hende, plan politico,plan di cierto grupo cu kier domina mundo, pero ningun di e plannan aki no por stroba e plan di Cristo Hesus di tuma lugar.

Pasobra hende por planea cuanto cos cu nan kier pero ta Dios ta tin e ultimo palabra, y si Dios no permiti nada no por pasa. Diabel no tin mas poder cu Dios, pero tur locual e sistema di mundo,ta pa kita atencion di hende for di locual ta di Dios, y pone hende kere den locual mundo ta desea.

Pero awor ta tempo pa nos kita nos bista for di riba cosnan di mundo,y pone nos bista riba Dios mescos cu wowo di sirbido ta riba man di nan shon.( Salmo 123:1-2).

No tin ningun di e podernan riba mundo ni di Rusia,ni di Merca,tampoco ningun grupo financiero poderoso cu por cambia palabra di Dios, tampoco por cambia e promesa di Dios.

E tempo ta trabahoso, e maldad a aumenta,nos ta mira cu bida di hende a perde balor, respet a bandona comunidad, hende ta papia mentira, y no tin ningun tiki berguensa pa gaña mas.

Adulterio y fornicacion a bira normal, inmoralidad ta trata di domina, norma y balor a bay na suela, y hasta ley ta wordo cambia dunando maldad tur chens pa avansa.

Cristo Hesus a priminti, pero tambe ta para scirbi tur e cosnan cu mester sosode prome cu Su binida, y awor nos tur ta mira con nan ta cumpliendo.

Su palabra ta bisa, cu E lo bini manera un ladron den anochi, y ta avisa nos pa tene cuidao pa E no bin haña nos den buracheria, parandiamento y preocupacionnan di bida. Pasobra E lo bini riba tur esnan cu ta biba riba superficie di mundo.

Ma sea alerta tur ora bay haciendo Oracion, pa boso por tin forsa, pa scapa di tur e cosnan cu ta bay tuma lugar, y para dilanti di e Yiu di hende.( Lucas 21:34-36).

Awor ta tempo pa confia den Señor.

Sinceramente, Pastor Marcel Balootje