No ta nada nobo, no ta algo cu hende por bisa cu nan no a tende nunca, e ta asina, y a yega e momento cu tur hende mester tuma Dios su palabra na serio, y ripara na unda nos ta, riba e mundo cual nos ta biba y tuma un decision serio ken ta guia nos pasonan.
E palabra di Dios ta bisa lo siguiente; E ladron ta bini solamente pa horta, pa mata y pa destrui. Ami ( Cristo Hesus) a bin pa nan tin bida, y pa nan tine na abundancia.(Juan 10:10).
E ladron cual ta e diabel ta bini pa horta for di bo, horta bo finansas, pone bo gasta mas de la cuenta, of biba un bida for di bo forsa, cu un maneho financiero hopi malo.
E ladron ta bini pa horta bo matrimonio y bo famia, pasobra e ladron( diabel) no ta gusta union familiar, e ta enemigo di fieldad, desencia,amor,e ta bon na altura kico ta nifica matrimonio, y con poderoso un matrimonio ta den bista di Dios.
E ladron ta bini pa kita libertad di hende, pa domina pensamento di hende, pa sembra maldad y malicia, pa causa accidente, rebeldia, inmoralidad, crimen, perversidad, tur esakinan pa desvia hende for di e caminda di Dios.
E ladron ta bini pa mantene hende den scuridad, pa nan rechasa e plan di Dios salbacion cu Dios a ofrece na henter mundo ( Juan 3:16), pa nan biba cu nan wowo sera, y no mira realidad di Dios,y reconoce cu solamente Cristo Hesus ta hiba nos na bida eterna.
E ladron ta troce e berdad, cambiando e berdad di Dios pa mentira, pone hende kere cu nan por biba manera kier, haci cambio den nan bida tanto mental, como fisico, y bay completamente contra naturalesa di Dios, y asina biba bao di condenacion. Pasobra e palabra di Dios ta bisa hopi cla, esun cu kere lo ta salba, pero esun cu no kere lo ta condena caba.
E ladon ta pone hende kere cu nan no tin di honra na tata y nan mama, nan no tin mester di respeta autoridad, pasobra esey ta e motibo cual Dios a corre cu e angelnan rebelde for di cielo, pa motibo di orguyo y rebeldia.Y esey ta locual ta pasando y ta para scirbi den 2 Timoteo 3:1-9 tocante temponan trabahoso.
Nos ta bibando den un tempo cual tur hende lo mira manifestacion di diabel riba e mundo aki y tur caminda, pasobra tur locual ta accidente, tur locual ta crimen, tur locual ta inmoralidad, abominacion, perversidad, violacion,atraco, malversacion,rebeldia idolatria,bruheria, santeria, mentira, adulterio, tin nomber, faam y donjo: Nan ta obra di diabel, di demonjo, di satanas , pasobra den ningun di e cosnan aki e Spirito di Dios no ta.
Dios no ta manda ningun hende bebe burachi, corre iresponsabel causa accidente, Dios no ta manda ningun hende keda sin respeta polis, Dios no ta manda ningun hende baila inmoral y indecente riba caya, y cu un conducta inmoral.
Dios no ta manda ningun hende bringa,Dios ta amor , Dios ta lus y den dj’E no tin nada, nada di scuridad, ora un hende ta comete su maldad, rebeldia, bagamunderia, ta e hende mes ta haci su cos, door di laga e diabel ganje pa asina bay contra e palabra di Dios, comete pica , cual ta hiba na morto spiritual, y contra ley cu por hiba na morto fisico. ( Santiago 1: 13-15).
Awor mas cu nunca ta tempo pa entrega nos bida na Cristo Hesus y laga E guia nos pasonan.
Sinceramente, Pastor Marcel Balootje
