For di basta tempo caba SOLO por bin tende con hendenan poco frustra ta lansa tur sorto di gritonan di agitacion contra varios desaroyo cu ta tumando lugar den nos pais. Un di e gritonan di agitacion y instigacion ta riba landspakket. Nan ta pinte como algo sumamente malo y kier spanta pueblo cune. SOLO DI PUEBLO sinembargo no ta bay tras di e galiñanan sin cabes, cu ta grita pa odio of rabia, pero nos mes ta tuma nos tempo pa repasa cada fragmento di landspakket.
KEN A BISA CU LANDSPAKKET TA MALO?
E gritonan di tur atardi, e mofa y chercha, ta nada otro cu un forma pa nan despecha nan rabia. Aki nos ta presenta un parti di landspakker riba educacion. E landspakket ta bisa claramente cu lo bini un grupo di experto for di 4 pais den Reino y hunto nan lo bay analisa y traha un investigacion riba enseñansa di nos pais.
Nan lo repasa varios topico pero tambe principalmente lo profundisa riba con pa conecta enseñansa cu e mercado laboral. Es decir, no por ta asina cu tin 500 jurista of abogado, y nos ta laga 100 studiante bolbe bay studia ley. Alcontrario, mester analisa kico falta na Aruba, y asina pone nan studia algo den e direccion cu por segura cu nan por haya trabao.
Un di e vacionan cu tin na Aruba, ta Arubiano den hospital. Pues aki ta un area cu sigur e investigacion lo bay mustra, cu mester encurasaha nos studiantenan pa bay studio algo cu nan por bin traha den hospital. Hospital tin bon salario, pues nan futuro lo ta asegura.
Asina tambe landspakket lo bay investiga e calidad di educacion na Aruba y lo bini cu proposicion con pa mehora esaki. Claro cu tur esaki lo por bay haci tambe e trabao di e proximo minister di enseñansa mas trankilo, pasobra e por conta riba un grupo di experto cu lo bay dunele e guia ta kico tur mester wordo haci.
E investigacion aki lo wordo haci riba tur nivel, pues tanto den scolnan publico como priva, pues mmanera SKOA cu ta bay bao di fundacion Catolico.
A bira tempo pa nos habri porta pa ideanan nobo, unda expertonan por traha un plan, pa dje forma ey pone nos educacion riba bon caminda. Na Aruba den ultimo temponan, no tin compredimento. Tur hende kier pleita cu otro y ningun por convence otro ki direccion mester cana. Tin hende cu tin bon idea, pero no por bende e maestronan.
Pues e situacion a bira awor cu atraves di landspakket, Aruba lo bay conoce un pagina nobo, un futuro nobo, y ta spera cu maestronan, simar, y tur esnan den e sector aki por accepta y traha na bienestar di Aruba sin ranca ciboyo cu miras personal.
EDUCACION NA INGLES
Por mira cu Minister Rudy Lampe a bini cu bon ideanan dilanti, pero constantemente e ta wordo bringa dor di maestronan cu no ta cla pa cambio. Por ehempel e kier a haci Colegio na Sanicolas un scol na ingles, den e preparacion pa futuro, unda mas y mas scolnan, tambe na Hulanda ta dunando lesnan na ingles. Tur esaki ta ideanan nobo, pero nos por mira cu esnan den veld tin miedo pa haci cambio, of nan kemen cu nan mes por haciele, pero nunca ta haciele.
Ta ora pa tur hende fria cabes y pone un banda tur echo personal y ban traha pa mehora nos calidad. Awor cu landspakket, un grupo di experto lo bay dicta finalmente kico ta mihor y e momento ey maestronan y dirigentenan mester ta habri pa asina duna contenido na e plan, cu lo bay mehora y hisa nivel di nos educacion.
Wantombanan kier spanta pueblo:
Bisando tur esaki? Pakico mester spanta hende e ora? Pakico tin poco wantomba cu solamente kier trece scenarionan di miedo, etc.etc? Ta ora pa tur wantomba stop cu nan bainanan, pone un stop na nan agenda politico, y duna nan contribucion positivo pa asina Aruba por progresa. Ora nan kier pretende cu landspakket ta algo hopi malo, y cu politiconan no a splica pueblo, unda nan mes a keda pa splica pueblo? Pasobra e pakete di landspakket ta publico y cu poco google por yega na dje. Y nos mester lubida cu e prome faseta ta pa haci investigacion y despues yega consensus. Pues si ainda por tin algo cu no ta sirbi na Aruba, semper por debati riba esaki y perfeccione.
