Riba dos diferente dia den e siman aki, SOLO DI PUEBLO a haya yamada, indicando cu nan a mira un conocido politico na oficina di Landsrecherche. No tin ningun indicacion di kico lo por ta sosodiendo, pero un cos ta sigur, cu tanto Diaranson mainta y diahuebs mainta a mira un politico na dicho kantoor. SOLO DI PUEBLO a aserca Ministerio Publico pa puntra riba e tip cu nos a ricibi via nos tip-line, pero Ministerio Publico a bisa nos: “Nos a tende”, “Nos no sa”. Hecho ta cu Ministerio Publico tambe a tende, pero no sa, cual ta un forma di no kier contesta, of alomenos no kier contesta ainda.
Un cos ta sigur, cu ta hopi politico tin cuenta di rindi na Landsrecherche y sigur riba faborecimiento di tereno, no solamente comercial, sino tambe huurgrond.
Algun politico a haya ta bon pa duna cierto hendenan 30.000 m2 di huurgrond, contra tur regla, contra tur estudio di factibilidad, sin cumpli cu maneho. Pa colmo esnan cu a haya e huurgrond, apenas tin 2 porco riba e tereno y 10 pal’i fruta. Pues, un desperdicio di tereno, unda otro hende por a haya tereno pa produci.
Por spera cu pronto lo sali mas informacion na claridad.
