Durante un diahuebs anochi di dialogo y reflexion na Vrije Universiteit Amsterdam, Prome Minister di Aruba mr. Mike Eman a comparti su vision riba futuro di Reino Hulandes y e importancia di construi un cooperacion moderno, balansa y basa rib’e balornan comparti. E encuentro a reuni varios academico, studiante y otro interesadonan pa dialoga riba filosofia, gobernacion y e relacionnan entre e paisnan den Reino. E encuentro tabata organisa p’e programa di master den filosofia, cultura y gobernacion di Vrije Universiteit Amsterdam hunto cu plataforma “De Nieuwe Wereld”. Segun Ad Verbrugge, docente di filosofia social y cultural na Vrije Universiteit Amsterdam y coordinador di e masterprogramma, e anochi tabata enfoca riba un conversacion habri tocante futuro di Reino. “Mike Eman a comparti con e la mira e futuro di Reino, basa rib’e historia comparti, pero tambe rib’e pregunta y oportunidad cu tanto Aruba como Hulanda ta enfrenta den un mundo cu ta cambia rapidamente,” Verbrugge a splica.
Durante e anochi, ex-Minister di Husticia y Siguridad Ernst Hirsch Ballin a reacciona rib’e discurso di Prome Minister y a coloca enfoke rib’e idea di “bon comun”, un concepto cu ta bin for di tradicion cristian democrata. Segun Verbrugge, e concepto ey a forma un hilo importante den e dialogo. “E debate a bay hopi profundo. A papia tocante e diferencia entre un nacion tradicional y e structura unico di Reino Hulandes, y con por construi un tipo di cooperacion nobo basa riba responsabilidad comparti y e balornan comun,” Verbrugge a expresa. Govert Buijs y dr. Jelle van Baardewijk tambe a contribui na e dialogo cu diferente reflexion y pregunta tocante gobernacion, identidad y futuro di e relacionnan den Reino. E anochi a caba cu un sesion interactivo unda e studiantenan y oradornan a participa activamente den pregunta y intercambio di pensamento.
Entre e studiantenan presente tabata Justin Quandus, un studiante di antropologia cultural, kende a describi e encuentro como “hopi interesante” pa mira diferente vision y pensamiento tocante construccion di Reino Hulandes. “Mike Eman a laga mi mira con diferente hende ta pensa rib’e institucion di Reino y con e dialogo por contribui na un miho comprension di nos futuro hunto,” e studiante a comenta. Quandus a enfatisa cu Aruba y Hulanda ta comparti un historia largo cu a influencia cultura, pensamento y desaroyo di ambos sociedadnan. “Nos tin un pasado hunto cu Hulanda cu ainda ta refleha den nos manera di pensa y den nos cultura. Mi ta kere cu den futuro nos por sigui traha hunto y fortalece e cooperacion den Reino,” el a expresa. Segun e studiante, e interes cu tabata presente entre e publico Hulandes a mustra cu tin un deseo pa conoce mas riba Caribe Hulandes y e relacionnan den Reino.
Gabinete AVP-Futuro ta considera importante cu e tipo di dialogo academico y social aki continua tuma luga, paso cu intercambio di conocemento ta contribui na mas comprension mutuo y na fortalece e relacionnan entre e diferente paisnan den Reino Hulandes.
