Dialuna mainta Solo di Pueblo a tuma nota di algun precupacion expresa pa Leonardo Figaroa riba un noticia cu Solo di Pueblo a presenta siman pasa di “manda 2000 ambtenaar cas”. Aparentemente Figaroa no ta satisfecho cu e forma cu e noticia a wordo presenta y el’a expresa su descontento publicamente.
Nos kier aclara cu, como medio di comunicacion, nos a presenta e informacion di manera preciso y husto. E articulo encuestion ta refleha corectamente e declaracionnan cu Leonardo Figaroa a haci den un comunicado di prensa. Solo di Pueblo no a altera e punto number 1 den su comunicado.
Nos por compronde cu segun Figaroa, su mensahe a wordo saca di contexto, pero ta importante pa informa cu e mes a admiti cu Solo di Pueblo a presente na un manera preciso. Por lo tanto, su afirmacion cu no a pidi’e permiso pa publica e noticia of no a puntre su opinion ta carece di tur base, comoquiera cu nos a quote su propio comunicado di prensa.
Relaciona cu su acusacion cu nos no ta cumpliendo cu standard di periodismo of decencia o etica di periodismo, nos no ta di acuerdo cune. Nos semper a mantene integridad y obhetividad den nos cobertura periodistico y nos no a cambia nada nada di su mensahe original. Nos a publica su punto number 1, intacto.
Solo di Pueblo ta sigui comprometi pa duna noticia imparcial y nos ta invita Figaroa of cualkier otro individuo pa comunica cu nos si nan tin cualke precupacion riba nos cobertura. Hunto nos por traha pa garantisa cu tur vos ta wordo scucha na manera husto y preciso.
E reclamo di Figaroa tabata riba e hecho cu e ta pidi pa Gobierno manda 2000 persona cas. Den su declaracion haci dialuna e mes ta admiti cu esaki ta corecto, cu ta esaki mes el’a pidi pa transiciona 2000 persona pa sector priva. Di kico e kier culpa Solo di Pueblo? pa nos ta incomrpendibel.
Pa no laga espacio pa duda, nos ta pone e prueba di su propio comunicado pa asina cada ken por saca nan mes conclucion.
