E siman cu a pasa mi a bishita e presentacion di e actornan Arubano cu a sigui e workshop di con pa educa cu teatro y con pa hinca un obra di teatro den otro. E workshopnan aki tabata presenta pa docentenan teatral for di St. Maarten, Aruba, Boneiro, Corsou, Hulanda y Surnam.
Un total di 18 actor a presenta tres obra cortico na e publico grandi cu a pesenta. Cada actor a ricibi nan certificado di participacion.
E tres obranan presenta tabata: DAISY- dedica na e señora di nos heroe nacional Padu Lampe, SUSPIRO DI UN MUHER – dedica na e labor fuerte cu e hende muhe Arubano ta hiba den e ciclo di su bida y E MIHO RECETA DI ARUBA – dedica na e receta mas tipico di Aruba su cuminda Pan Bati. Paz, energia y amor ta parti importante di e receta.
Loke cu mas a acapara mi atencion ta e forma disciplina con cada actor a presenta nan obra. Teatro por ta haci na cada luga y no mester ta mara na un sala luhoso den cua prijsnan ta extremadamente halto. E escenario tabata e biaha aki e tereno amplio di Colegio Arubano.
Pabien cada actor y maestro sin lubida maestro Amy Lasten y Cultuurfonds, Cede Aruba y Unoca p’e sosten enorme. Teatro Arubano tin cu keda existi pa hopi aña mas y ta keda na cada un di nos pa keda stimul’e y inculca su amor den nos futuro generacion. E ta un arte mucho bunita y unico pa nos lag’e bay perdi. Pronto tur Arubiano interesa den e arte aki lo tende masha bon noticia tocante di un master opleiding cu lo ta ofreci door di Amsterdam Hogeschool voor de Kunsten.
