Oranjestad, – Diahuebs mainta durante un rueda di prensa e conocido cantante Levi Silvanie hunto cu One Happy Bowl (OHB) a anuncia e detayenan di Aruba su promer festival di salud. E festival ta hiba e homber di ‘One Healthy Day’ y lo tuma lugar dia 20 di Maart 2022.

Mirando cu mundo completo ta pasando den momentonan cu diferente desafio incluyendo nos islanan ABC,  ta importante pa stimula salud fisico y mental. Esaki ta netamento un di e obhetivonan pa e proyecto di ‘One Healthy Day’. E organisadornan kier uni, inspira y activa nos comunidadnan pa ta mas consciente y pro-activo pa cu nan salud.

‘One Healthy Day’ ta un festival di 1 dia cu kier inclui tur persona riba nos isla d Aruba. Ora cu ta papia di ‘tur persona’ no ta referi na solamente edad of sexo pero tambe na nivel di salud y of abilidadnan fisico. Cu esaki por imagina cu lo tin algo pa tur hende por participa y na nan nivel. Aki por imagina actividanan manera hiking, yoga, bailamento, deportenan den ekipo, bootcamps y mucho mas. E actividadnan lo cuminsa for di 5 or di mainta y lo sigi te cu 10 or di anochi rond di Aruba.

E concepto ta cu tur rond di nos isla lo tin diferente actividadnan deportivo cu lo tuma lugar simultaneamente. E parti mas interesante di e dia aki ta cu tur e actividadnan , workshops etc lo ta completamente gratis. E idea ta pa di e forma aki promove un estilo di bida saludabel. Naturalmente lo tin un enfoke tambe riba e parti di cuminda. Pa asina educa e comunidad riba e importancia di come saludabel. Lo comunica cu restaurantnan pa e dia aki prepara un menu special cu enfoke riba salud.

E deseo di e organisornan Levi Silvanie y OHB ta pa famianan hunto por explora e diferente organisacionan, deportenan y otro iniciativanan cu Aruba ta ofrece pa asina por biba un bida mas den balans.

Naturalmente kiko ta un festival sin musica y entretenimento. ‘One Healthy Day’ lo tin presenta un programa amplio tambe di esaki.

Pa mas informacion por bishita e website via www.onehealthydayaruba.com of via instagram.com/onehealthyyouaruba

Un danki na sponsornan One Happy Bowl, Levi Silvanie Compani, P.O.H, Dr. Pixels, Aruba Heart Foundation, Aruba Sport Unie, Fundacion CVA, Fundacion Diabetes Aruba, Botica di Servicio, DA, Benu Pharmacy, Fundacion Movimento ta Bida, Aruba Paralympic Committee y Fundacion Autismo Aruba.

LEAVE A REPLY

Please enter your comment!
Please enter your name here