Partido AVP ta preparando pa un momento trascendental den su historia. Durante conferencia di prensa, Lider di AVP Mike Eman a anuncia e proximo Congreso di partido, caminda oficialmente lo tuma luga traspaso di liderazgo y responsabilidad na un generacion nobo. Segun Mike Eman, e decision no ta uno cu a tuma facilmente ni basa riba interes personal. E ta resultado di reflexion tocante responsabilidad di un partido politico pa sigui representa e necesidadnan, dolor, aspiracion y speransanan di comunidad den cada epoca., “Den historia di Partido AVP, cada biaha tin un generacion y cada biaha tin un traspaso di un generacion pa otro,” Eman a expresa. Segun e lider, precisamente e capacidad pa renoba su dirigencia y mantene conexion cu realidad di comunidad ta un di e fortalesanan historico di AVP. E congreso lo tuma luga na Aruba Marriott Resort Grand Ballroom diadomingo 4 di october cuminsa for di 9 or di mainta. Mas informacion por subi riba www.avp.aw
No un despedida, sino bonbini na un era nobo
Eman a enfatisa cu Congreso no mester ta mira principalmente como despedida di un lider. “Nos no ta bay den forma di despidi di un lider, pero nos ta bay den forma di yama bonbini na un lider y un era nobo pa partido AVP,” el a declara. E concepto “Era di Relevo” ta representa e traspaso di responsabilidad na personanan prepara, cu capacidad, dedicacion y e mesun compromiso pa sirbi comunidad. Eman a reconoce cu e decision tin un carga emocional particular. Su relacion cu AVP ta pasa door di diferente generacion di su propio famia, mientras cu tin sostenedornan cu a conoce su abuelo, su tata y su mama y cu durante añanan a carga e partido hunto cu ne. Pero precisamente e historia ey, segun Eman, ta trece un otro responsabilidad. E generacionnan cu durante añanan a sostene AVP, awe tin yiu y nieto cu tambe mester por haya un partido cu ta comprende e realidad di nan epoca.
Renobacion cu continuidad
Pa Mike Eman, relevo no ta nifica abandona e principionan cu a forma AVP. Economia, turismo, enseñansa y e realidad social y cultural por cambia cu pasa di tempo, pero e fundeshi mester permanece. El a menciona entre e principionan aki amor propio, solidaridad, responsabilidad pa siguiente generacion y construccion di un comunidad caminda cada persona tin oportunidad pa desaroya su potencial. E reto pa e siguiente dirigencia lo ta esey, combina renobacion cu continuidad: interpreta necesidadnan di e momento, pero mantene e balornan cu durante generacionnan a forma e identidad di AVP. Eman a indica tambe cu dentro di partido tin personanan cu durante añanan a prepara, intercambia idea y reflexiona riba e tipo di liderazgo cu Aruba ta exigi. Congreso lo brinda e espacio democratico pa formalisa e siguiente paso y presenta e dirigencia cu lo carga e responsabilidad.
Un invitacion na henter famia AVP
E Congreso, mira como un momento pa reuni e sostenedornan, e activistanan y e miembronan cu durante diferente generacion a forma parti di trayectoria di AVP. Mas cu mira solamente bek, e encuentro ta pa reafirma continuidad di un compromiso: sirbi comunidad y pasa e responsabilidad ora un generacion nobo ta cla pa carga esaki. Pa Mike Eman, e momento a yega. Un generacion a carga e responsabilidad. Awor ta prepara e caminda pa otro tuma e estafette. E Congreso lo marca oficialmente entrada di Partido AVP den su “Era di Relevo”.
