Lider di Fraccion AVP den Parlamento, Jennifer Arends-Reyes, a presenta un serie di preguntanan oficial na gobierno tocante e aumento reciente den tarifa di transporte di container y zeevracht cu ta bin Aruba. Segun Arends-Reyes, e aumento aki tin implicacion directo pa costo di bida y ta afecta tur famia Arubiano.
“Cada aumento den costo di carga ta refleha directamente den e prijs cu nos pueblo ta paga, particular den supermercado y den otro producto di uzo diario. Esaki no por sigui pasa sin claridad, ni reaccion concreto,” Arends-Reyes a declara.
Den e preguntanan oficial entrega na gobierno, Arends-Reyes ta pidi informacion detaya riba e naturaleza di e aumentonan, for di ki fecha nan lo drenta na vigor, y ki factornan principal ta contribui na e subida di tarifanan. Entre e posibel causanan menciona ta aumento den costo di combustibel, disturbionan den e cadena internacional di suministro, scarsedad di container, tarifanan di waf y desaroyo geopolitico na nivel mundial.
E lider di Fraccion AVP tambe a solicita na gobierno pa presenta un analisis cla di con e aumentonan den transporte y zeevracht ta contribui na inflacion general na Aruba, y cua producto y sectornan ta mas afecta. Entre esakinan tin cuminda basico, material di construccion y otro producto esencial cu famianan ta uza tur dia.
Ademas, Arends-Reyes ta puntra si gobierno a sostene dialogo cu importadornan y proveedor di logistica pa busca manera di limita e impacto di e aumentonan riba e consumidor final.
“Nos mester proteha e consumidor Arubiano. Gobierno tin responsabilidad pa actua di forma proactivo y busca solucionnan sostenibel pa evita cu costo di importacion ta sigui subi sin control,” Arends-Reyes a agrega.
Finalmente, e Parlamentario ta pidi gobierno pa considera pa explora posibilidadnan por ehempel reduccion di belasting of invoerrechten riba productonan esencial. Tambe e parlamentario ta enfatisa e necesidad pa presenta un plan structural cu ta contribui na haci Aruba menos dependiente di un cantidad limita di ruta di transporte y fortalece resiliencia economico di nos pais.
Sra Arends-Reyes ta spera un respuesta pronto, cla y concreto di parti di gobierno, compaña cu accionnan cu por yuda cu e presion riba nos comunidad y proteha bienestar di pueblo Arubiano.
