Durante e sesion parlamentario pa trata e Ontwerp-Landsverordening Instelling Ministeries, lider di fraccion AVP Jennifer Arends-Reyes a destaca cu claridad y firmeza e importancia di e ley aki den cuadro di e gobierno nobo AVP–Futuro, cu a ricibi un mandato claro di 12 asiento pa forma y dirigi nos pais.
Segun Arends-Reyes, e ley cu ta determina institucion y funcionamento di ministerionan “no ta simplemente un documento tecnico; e ta e fundeshi administrativo pa sigura cu gobierno por traha cu claridad, responsabilidad y eficiencia na bienestar di nos pueblo.”
El a splica cu na Aruba, caminda reto economico y social ta un realidad, e structura di ministerionan tin cu ta moderno, funcional y orienta riba resultado. Transparencia, claridad riba portafolionan y pa evita tarea dobel ta esencial pa forma un aparato gubernamental cu ta beneficia ciudadano y ta proteha di mal maneho.
Arends-Reyes a referi tambe na e lista largo di problema cu no a haya atencion den e ultimo shete aña, mencionando ehempelnan manera problema na Censo, imposibilidad pa haya cita, miles di solicitud pendiente na DIP, infrastructura den mal estado, falta di mantencion di caretera, problema di planta di purificacion di awa y falta di planificacion y implementacion pa proteha naturalesa y sostenibilidad. El a enfatisa cu e tipo di situacion aki ta mustra mas cu cla con Aruba mester di un sistema gubernamental cu ta traha pa pueblo, no contra pueblo.
E lider di fraccion a pone enfasis riba un punto critico: “No ta djis pa tin un titulo. Nos mester tin indicadonan di resultado, evaluacion, disciplina financiero y personal capacita. Un ministerio sin direccion ta un riesgo pa pueblo.” Arends-Reyes ta insisti cu si un ministerio of parti di un cartera no ta hiba un vision, mester tin mecanismo pa redistribui responsabilidad pa garantisa cu ningun area esencial ta keda sin atencion.
Arends-Reyes tambe a destaca cu structura ministerial tin relacion directo cu presupuesto y plan di gobierno. Solamente ora cu a defini ken ta responsabel pa ki area, por evalua impacto financiero y social cu responsabilidad. E LIM mester crea un conexion cla entre plan di gobierno, presupuesto y evaluacion continuo.
Finalmente, e lider di fraccion AVP a reafirma cu parlamento tin un rol vital pa sigui monitor e implementacion y solicita evaluacion despues di un periodo di ehecucion. “Aruba mester di un aparato gubernamental fuerte, cla y cu ta duna resultado. Nos ta comprometi pa sigui wak riba implementacion y pa traha pa un Aruba cu ta sirbi su pueblo, cu transparencia y responsabilidad.”
