Durante e reunion di Parlamento di dia 25 di februari 2026, Fraccion Leader di AVP, Sra. Jennifer Arends-Reyes, a hiba palabra den e debate tocante e Nota van Wijziging relaciona cu e iniciativa di ley (OLV #1039) pa modifica e Landsverordening Wegverkeer (AB 1997 no. 18) y e Wetboek van Strafrecht van Aruba (AB 2012 no. 24). E propuesta tin como obhetivo pa criminalisa stuurmento iresponsabel na Aruba.
Anteriormente, na cuminsamento di e aña parlamentario, Fraccion di AVP, den persona di Sr. Hart, a solicita un vragenuur cu e minister responsabel. Durante su intervencion, Arends-Reyes a expresa apoyo firme pa aumenta castigo pa chauffeurnan cu, di manera iresponsabel, ta pone bida di otro hende na peliger riba caminda.
El a enfatisa cu stuurmento iresponsabel — incluyendo exceso di velocidad, pustamento, uzo di celular mientras ta stuur y stuur bou di influencia di alcohol of droga — no por keda sin consecuencia severo. “Cada decision iresponsabel riba caminda por tin consecuencia fatal. Nos tin un obligacion moral y legal pa proteha nos comunidad,” Arends-Reyes a declara.
No obstante, e parlamentario a señala cu castigo so no ta suficiente pa logra un cambio structural. P’esey, el a presenta un mocion enfoca riba prevencion y conscientizacion den trafico, cu ta solicita gobierno pa desaroya y implementa un programa integral y structural di prevencion di trafico.
E mocion ta propone, entre otro:
• Introduccion di educacion di trafico for di scol primario te cu nivel secundario y enseñansa superior;
• Organizacion di campañanan anual di conscientisacion enfoca riba velocidad, alcohol, droga y distraccion (manera uzo di celular);
• Colaboracion estrecho cu Korps Politie Aruba, scolnan, organisacionnan social y sector di seguro;
• Investigacion pa introduci un curso obligatorio di concientisacion pa conductornan nobo y pa esunnan cu comete infraccionnan serio;
• Informacion na Parlamento dentro di tres luna tocante planificacion, implementacion y cobertura financiero di e programa.
Segun Arends-Reyes, cifranan anual di accidente na Aruba ta mustra cu miles di accidente ta registra cada aña, unda un parti significativo ta relaciona cu exceso di velocidad y stuurmento imprudente. “Prevencion ta inverti den futuro. Si nos logra cambia mentalidad y comportacion, nos por preveni desgracia y salba bida,” e parlamentario a enfatisa.
El a conclui su intervencion señalando cu siguridad vial ta un responsabilidad comparti entre gobierno y sociedad. “Nos ta manda un señal cla: Aruba no ta tolera stuurmento iresponsabel. Pero na mes momento, nos ta traha activamente pa educa, conscientisa y preveni.”
Cu e iniciativa di ley y e mocion presenta, Sra. Jennifer Arends-Reyes ta reafirma compromiso di fraccion di AVP pa un Aruba mas sigur, unda respet, responsabilidad y proteccion di bida humano ta central riba nos camindanan.
