Lider di Fraccion di MEP, Hendrik Tevreden: Huramentacion di Jurima Bryson como prome Ombudsman di Aruba ta un paso historico pa fortalece Estado di Derecho

Lider di Fraccion di MEP, Hendrik Tevreden, a expresa su satisfaccion den sala di Parlamento diamars ultimo, enfatisando cu esaki ta un momento historico pa Aruba: e huramentacion di señora Jurima Bryson como e prome Ombudsman di Aruba.

Esaki no ta solamente un logro personal, sino tambe un paso fundamental pa e fortalecimento di e estado di derecho y pa proteccion di e derecho di nos ciudadanonan.

Jurima Bryson

Jurima Bryson ta un ciudadano di San Nicolas. Su biahe educativo a cuminsa na St. Paulus School y despues na Colegio Arubano. Hopi lihe el a mustra su capacidad academico excepcional, y cu gran determinacion el a bay Hulanda pa sigui su estudio na Universiteit Leiden, un universidad di prestigio. Na e edad di 22 aña, el a haya su Master den Derecho y el a specialisa su mes den Ley Notarial.

Den su trayecto profesional, Jurima no a limita su mes na un tereno so. Cu 25 aña el a huramenta como abogado, y awe e tin 17 aña di experiencia den e mundo huridico. Diesdos aña pasa el a funda su propio bufete di abogado y te recientemente esaki tabata e unico bufete den Savaneta.

Logronan y Contribucion Social

Ademas di su carera profesional, Jurima a contribui na hopi organisacion civico, manera Rotaract y Orde di Abogadonan, caminda el a asumi e rol di tesorero. Su dedicacion y liderazgo ta un aspecto clave den su exito profesional y comunitario.

E rol di Ombudsman

E nombramento di Jurima Bryson como Ombudsman ta marca un capitulo nobo den nos pais. Como Ombudsman, e lo ta e brug crucial entre pueblo y gobierno, brindando un espacio sigur pa e ciudadanonan busca ayuda ora cu nan ta sinti nan no ta wordo trata cu husticia. E Ombudsman ta investiga casonan di manera independiente y ta actua preventivamente, asegurando cu e proseso gubernamental ta core bon.

Un esfuerzo historico pa Aruba

Desde 1997, hopi esfuerso a wordo haci pa crea e institucion di Ombudsman na Aruba. E iniciativa a cuminsa bao e liderazgo di Zulay v. Poppen na 2004-2005. Den 2011, Wyatt Ras y Lopez Tromp a introduci un mocion pa institui tambe un Kinderombudsman.

Finalmente, sr. Edgard Vrolijk a conclui e proceso di legislacion cu a permiti e creacion oficial di e ley. Sin duda, mester di un pabien grandi pa señora Kelly, Kwartiermaker di Ombudsman, pa su esfuerzo y compromiso den e desaroyo di e institucion.

Jurima Bryson – Un Rol Crucial

Jurima Bryson lo ta un pieza clave den e cadena di proteccion pa e ciudadanonan. Su experiencia y dedicacion lo yuda pa mehora e comunicacion entre pueblo y gobierno, contribuyendo na un trato mas husto y transparente den nos sistema.

Apoyo Familiar

Jurima ta bin di un famia grandi y uni. E ta e di dos yiu muher den un famia di cuater. Su mayornan ta casa pa 47 aña y nan union a sirbi como fuente di stabilidad y inspiracion pa Jurima.

Deseo di Exito

“Nos ta desea di curason hopi exito na Jurima Bryson den su rol nobo como Ombudsman di Pais Aruba. Su capacidad pa compronde asuntonan huridico compleho, su conexion cu e comunidad, y su fe den Dios lo garantisa cu e lo cumpli cu su rol cu integridad, empatia, y forsa”, Hendrik Tevreden a expresa.