Parlamentario Marco Berlis (MEP):
Gabinete Wever-Croes I-II a demostra di por desplega liderazgo fuerte den temponan decisivo, nunca antes bisto y memey di calamidadnan global. Liderazgo no ta ora bo tin djis un titulo. E ta wordo demostra den e forma cu bo ta lidera, duna ehempel, organisa y maneha e pais den TUR momento. Cu tur certesa, e 7518 votonan deposita pa Minister President Evelyn Wever Croes y e 20701 voto pa partido MEP no tabata djis votonan di aprobacion di maneho di un pais, pero sigur aprobacion di e maneho complica di un pais den un crisis economico y pandemia mundial. Ademas mester subraya cu Gabinete Wever Croes I-II a bin haya nos pais na rand di bancarota. Rapportnan di CBA, CBS, y ATA entre otro ta demostra esaki claramente y ta obtenibel riba nan website pa pueblo por wak. Nos gobierno na 2017 a hereda un economia den ruina, un CAft y LAFT pa e maneho desastroso di 8 aña di gobierno di AVP y asina mester a cuminsa pone ordo y trece speransa den un panorama di realidad caotico y scenario sumamente scur.
Pa colmo awor nos mester lidia cu e consecuencianan economico mundial pa via di e guera na Ukraina cu a causa inflacion mundial riba tur producto cu nos ta importa, specialmente gasolin. Sri Lanka ta raciona gasolin pa via di e costo di esaki. E pais aki casi no tin e finansas pa importa gasolin y den tur pais rond mundo esaki a subi na prijsnan record. No ta scenarionan desea ni ideal pa un gobierno sinta den dje. Pero si un scenario ideal pa lidernan autentico emerge y cu tin e curashi pa tuma decisionan impopular pa otro, pero necesario pa e avanse di e pais. Nos no por sigui pusha problemanan pa futuro, nos mester resolve y pone accion awe. Decision y accionan cual no tur hende lo ta di acuerdo cu ne mesora pa via di politica barata di oposicion. Sinembargo pueblo lo sa di compronde ora tur lo wak e frutanan positivo den futuro.
Historia a mustra con un ex-lider debil, Mike Eman, sin curason pa pueblo a dobla dilanti un crisis cu e mes a crea. Historia ta mustra nos cu e ex-lider aki a huy, yora, y bebe ensure pa via di decisionnan desastroso cu e mes a tuma. Un ex-lider cual su legado lo conta con e la endeuda, debilita, empobrese, apoya y sostene corupcion, corta inversionan, malgasta fondonan publico, invita Hulanda bin kita nos autonomia cu CAFT y e LAFT, y a bai bebe ensure bao di palo pa su accionan descabeya. Historia di nos pais ta siña nos cu nunca mas nos kier ni mester un lider asina aki. Un lider cu awe ta pretende di tin TUR e contestanan pa e crisis di awe pero nunca ta presenta esakinan den ningun reunion, ni publico ni tras di porta. E unico solucion di partido AVP ta baha Gobierno pa nan mes goberna, pero goberna con? Ta ocho aña desastroso el a laga atras den historia y Mike Eman a pasa pa pasado, sinembargo e debe cu el a laga atras tey pa nos paga te cu 2044! Nos pais mester paga 100 miyon florin di awor enadelante tur aña. Otro desafio mas pa nos liderazgo actual.
Sinembargo awe nos tin un gobierno y parlamento den coalicion cu ta mantene su bista riba e bienestar, progreso y restauracion di nos pais memey di e peor crisis den su historia. Memey di e calumnia di cierto medionan y politica barata di MAS y AVP, nos lo continua di mustra liderazgo y caracter.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
