Proyecto di Baki den Bario cu acogida grandi un biaha mas den bario. Durante e fin di siman tras di lomba, a tuma luga un otro edicion di Baki den Bario na San Nicolas bou coordinacion di Bureau City Inspector, DOW y Serlimar na unda a pone un cantidad di baki grandi riba e veld dilanti Botica Centro Medico, cu a resulta uno hopi adecua.
Prome Minister mr. Mike Eman como tambe Minister di Turismo mr. Wendrick Cicilia tabata presente pa duna atencion na e esfuerso pa deshaci di desperdicio acumula den bario y den cura. Na mes momento ta analisando riba cua dia ta mas factibel pa organisa e accion aki. Segun ta acumula informacion, lo sigui apunta e agenda pa e continuacion di Baki den Bario durante aña.
Despues di e exitoso Baki den Bario cu a tuma luga pariba di Watertoren na San Nicolas, e habitantenan a haci un peticion na Gobierno pa trece Baki den Bario un biaha mas mirando cu hopi habitante no a haya e oportunidad pa deshaci di nan desperdicio durante e accion di Baki den Bario. E biaha aki, a pone e bakinan grandi di sushi, riba e veld dilanti di Botica Centro Medico / Pit Stop Restaurant situa den Bernhardstraat.
Prome Minister mr. Mike Eman a informa cu e resultado tabata hopi positivo, un total di 449 vehiculo carga cu desperdicio a yega na e sitio, caminda cu na final di dia a hiba un total di 57 baki completamente yena cu desperdicio. Prome Minister a haci un apelacion na ministerio di turismo pa sigui brinda e sosten pa logra e obhetivo pa tin un Aruba limpi, tanto pa nos comunidad como pa nos bishitantenan. Esaki mester ta un esfuerso nacional.
Minister Cicilia a indica cu: ”Un Aruba dushi pa biba, ta un Aruba dushi pa bishita”. Slogan cu ta acapara e vision. Minister su presencia sigur a brinda e sosten cu e proyecto, di un gobierno conecta cu e pueblo, den barionan y den e hendenan contrario na locual tabata sosode den gobernacion anterior. E diferencia palpabel entre administracion y gobernacion.
Tin un necesidad grandi pa tipo di iniciativanan manera Baki den Bario, mirando cu desde cu a cera e dump na Parkietenbos, e sitionan asigna pa hiba desperdicio residencial ta limita pa den siman y pa hopi e ta impagabel. E ekipo dinamico di Baki den Bario ta responde debidamente na e yamada di comunidad y ta pone bakinan den bario strategicamente pa yega na e meta comun, un Aruba limpi y dushi pa biba.
