”Lo E ta un gran homber y nan lo yam’E ’Yiu di Altisimo.’ Señor Dios lo dun’E trono di su antepasado David; te den eternidad lo E ta Rey di e desendientenan di Jacob y na su reino lo no tin fin.” (Lucas 1, 32-33)

Awe ta fiesta di Birgen Maria, Reina di Shelo y Tera. Esaki ta recorda nos cu Maria, mama di Hesus, e Rey, lo participa di su gloria celestial. Maria, un hende muhe humilde y creyente di Nazaret a haya e titulo di Reina. Sinembargo e no tawata kier nada otro sino di ta un sirbido di Señor. Su reinado no ta di e mundo aki, ni ta consisti di splendor y luho, sino di amor, ayudo y sirbishi na e humanidad. Maria ta e Reina di fe humilde y profundo, di fieldad humilde y perseverante. E ta e ”prome dama”, di e Reino di Dios: un reino di hende humilde y creyente, un reino cu ta keda scondi pa esnan cu ta busca nan mes. E ta hunto cu Dios den shelo intercediendo pa esnan cu ta acerca pa pidi su ayudo. E ’pasaje’ di e anunciacion aki ta mustra e inicio di e titulo aki, ora e angel a bisa Maria cu su Yiu lo ta Rey pa semper. Hesus ta e Rey di henter universo. P’esey su mama a ricibi e titulo di Reina di forma natural.

Oracion: O Dios, Bo a scoge La Birgen Maria pa ta mama y reina di nos tur. Duna nos e gracia di confia riba su intercesion y di alcansa bo reino di splendor pa Cristo nos Señor. Amen.