Minister di Enseñansa Endy Croes:
ORANJESTAD – E mandatario nobo di enseñansa, Minister Endy Croes a bisa dialuna mainta cu e problema di werksternan di SKOA lo conoce un solucion definitivo dentro di 30 dia. E siman aki e minister lo sinta cu SKOA y lo propone un comicion di experto, hunto cu SKOA, Departamento di Finansas y di su ministerio, kisas tambe un experto outsider, pa sinta y bini cu e solucion.
Manera ta conoci, esaki ta un di e mayor problemanan di enseñansa unda werksternan ta den incertidumbre y no sa con nan lo sigui cobra.
Nan a wordo hinca den payroll di gobierno, pero tin sentencia di huez cu a descarta esey y nan mester wordo saca afor cu consequencia cu nan no tin mas e entrada manera ora nan tabata riba payroll.
E comicion mester bay analisa tur sentencia di huez, tur desicion, y tur solucion viable pa asina por crea un structura solido pa por sigui dilanti.
Minsiter Croes a sali den su prome salida y a repasa un cantidad di problemanan den enseñansa y a bini cu un modelo di “3” prioridad. A pidi tur stakeholders pa trece nan 3 prioridad pa asina por cuminza traha. Ora termina cu 3, lo sigui pa otro 3.
