Diabierna merdia 2’or e dama C.F.D. a presenta den Corte pa e caso penal cu Ministerio Publico a cuminsa contra dje. E caso tabata pro forma y Hues a stipula cu na Juli 2026 lo trata e caso.
SOLO DI PUEBLO por a compronde cu abogado a pidi pa laga C.F.D. liber pero Fiscal a bay contra. Hues a rechaza e peticion di abogado y a bisa cu C.F.D. ta keda encarcela te Juli 2026 ora di trata e caso. Tambe Hues a instrui pa scucha dos testigo manera abogado a pidi y tambe pa psycologo traha un raport.
ACUSACIONNAN
Fiscal di Ministerio Publico ta acusa C.F.D. cu riba 4 Januari 2025 riba Smith Boulevard un tiki despues di Renaissance Hotel, a dal mata cu un Jeep dos persona y intento di mata otro dos persona, kendenan na e momento ey tabata cruzando caminda. C.F.D. tabata core cu un velocidad hopi halto y sigui core bay.
Fiscal a presenta mas acusacionnan contra C.F.D. cu ta:
– tabata core sin rijbewijs y sin keuringskaart;
– no tabata core na man drechi di caminda;
– tabata core mucho duro y no a controla su velocidad;
– tabata core auto bou influencia di alcohol
DAMA TA KEDA DETENI
E caso tabata pro forma o sea cu Hues lo scucha peticion di abogado y Fiscal y tambe lo fiha fecha pa tratamento di e caso. Ta asina cu abogado a trece defensa pa suspende e detencion di C.F.D. y cu kier scucha dos testigo. Tambe e abogado a pidi pa laga un psycologo traha un raport di e situacion di C.F.D.
Fiscal a para riba cu C.F.D. mester keda encarcela, mirando e seriedad di e caso. El a mustra cu dos persona a wordo mata y e otro dos personanan a haci denuncia di intento di mata.
Hues a rechaza peticion di abogado pa laga C.F.D. liber. Hues a bisa cu C.F.D. ta keda encarcela te dia 3 Juli 2026, dia cu lo trata e caso.
Hues a ordena tambe cu mester scucha dos testigo y cu psycologo lo traha un raport despues di a evalua C.F.D.
