E boluntad di Dios semper lo prevalece riba tur cos.
Pasobra hopi hende ta kere ta nan ta dicidi, of ta nan placa ta hunga un rol, of ta segun amistad e cos ta bay, pero esun cu sa, sa di berdad cu ta manera Dios dicidi asina e cos tin cu bay.
Hopi biaha e cos ta mustra manera e ta contra bo, pero ta Dios ta proteha bo , E tin su manera di haci’e, aunke e por haci dolor, pero Dios tin su manera di haci tur cos, y tur cos lo obra pa bon ora bo ta kere den Dios.
No corre tras di fama, ni tampoco tras di placa, pero mantene bo fe y confiansa den Dios, pasobra na final di cuenta ta Dios mes ta esun cu ta respalda bo, hende no tur momento ta di acuerdo cu bo, pero Dios nunca lo bandona bo esey Dios a priminti, y locual Dios primiti semper E lo cumpli.
Scondemento di maldad no ta cumbini ningun hende, pasobra Dios mes lo saca tur cos na lus.
Pasobra no tin nada scondi cu lo no wordo revela,ni nada secreto cu lo no bira conoci y sali na cla.
Locual ta pasa cu hopi hende a perde temor di Dios, y kier haci locual nan kier y a perde respet pa Dios, pero Dios keto bay tin misericordia di hende y no ta trata hende manera nan ta trata Dios.
E sistema di mundo tin hopi hende enganja, pasobra enbes di pone Dios na prome lugar nan ta pone nan propio interes na prome lugar, nan ta halsa nan mes enbes di duna gloria na Dios.
Nan ta ireconcilaibel, grosero, arogante, orguyoso, stimado di maldad, cu ta pretende di mustra bon, pero nan sa masha cu nan curason no ta bon.( 2 Timoteo 3:1-5).
No sea pura pa bisa si pa tene hende contento, no coopera den malcriansa, tampoco sostene rebeldia, pasobra mayan e berguensa lo ta pa mayor y yiu.
Mihor bisa no y keda na malo cu hende , pero mantene e bon ralcion cu Dios, pasobra na final tur hende mester duna cuenta na Dios.
Pesey no tene miedo di nan,pasobra no tin nada tapa cu lo no wordo revela, y nada scondi cu hende lo no hanja sa.
Scuridad lo no por tapa lus, mentira no por soporta berdad, y inmoralidad no por vence decensia.
Ta hopi bataya perdi tin, cu hende ta luchando pa gana, pero nan no kier reconoce Dios, arepenti y aparta for di maldad, pesey nan ta montona furia, dolor y stress pa nan mes, pensando cu nan tin rason y cu Dios ta malo.
Pesey no sigi husga prome cu tempo,ma warda te ora Senjor bini,Kende tambe lo trece na cla e cosnan scondi,den scuridad, y descubri e intencion di curason di hende, y e ora ey cada hende lo ricibi su elogio for di Dios.( 1 Corintionan 4:5).
E tempo di tira piedra sconde man a pasa, pasobra prome cu bo cohe e piedra, ya Dios a mira bo curason, pasobra tur locual cu hende ta haci , ta sali for di nan curason, pasobra for di e bon curason ta sali bon tesoro, y for di emal curason ta sali mal tesoro, pasobra caminda bo curason ta eynan tambe bo tesoro ta.
Tur locual ta haci bao di man,lo wordo presenta den cara, pasobra e lus di Senjor ta asina cla cu nada por scapa for di dje.
Dios ta mas grandi cu nos curason y E sa tur cos.
Sinceramente, Pastor Marcel Balootje
