E circunstancianan rond di e morto di Sergio Maduro, un guardia di seguridad di 44 aña trahando na e departamento di CEA, ta sugeri e posibilidad di un asesinato. Ta specula cu el a wordo ataca na su cabes, cu sla y corta.

E sitio unda a laga e curpa band’i caminda, no tin camera di seguridad den cercania, cual a permiti e agresor pa keda indetectabel. E escogencia strategico di e lugar unda a laga e victima ta mustra cu esun cu a ehecuta e acto aki tabatin bon conocimento di e area, cu no tin camera y asina pa evita di ser capta pa esakinan.

Ademas, ainda no a localiza e auto di Sergio Maduro, poniendo e pregunta crucial: unda su vehiculo ta? E misterio aki por duna un bista importante y ta clave pa e investigacion.

No tin ningun informacion tampoco di su telefon, asumiendo cu e lo tin uno.

Rumornan di un otro medio di comunicacion ta sugeri ta trata di debe unda un grupo no a ricibi nan pago, vinculando e situacion na un grupo venezolano di baho mundo cu ta presta placa.

E informacion detaya di e medio di comunicacion ta confirma cu e medio tin bon contacto cu e grupo venezolano, informando cu tin individuonan cu recientemente a yega Aruba den lancha, a bin pa haci trabaonan di cobransa di debe pendiente. E informe aki ta trece mas pregunta crucial: Tin mas hende cu debe placa? Y por spera mas likidacion a corto plaso?

Un conocir a bisa cu Sergio ta coleccionista di avion miniatura den forma di replica. E ta dispone di un cantidad di avion miniatura. Esaki kisas ta debi cu el’a nace y biba den cercania di pista di airport.

Mientras e investigacion ta tumando lugar, atencion ta wordo poni pa decifra e motibo tras di e presunto asesinato aki y riba buskeda di e paradero di e vehiculo di Sergio Maduro. E reto di e caso aki ta haya pruebanan importante den e investigacion grandi aki pa clarifica e hecho y hiba e responsabelnan dilanti husticia.

LEAVE A REPLY

Please enter your comment!
Please enter your name here