Cu gran asombro mi a scucha e “djaca” politico papia di e consecuencia di un falta di maneho di desperdicio na Aruba. Ela usa palabranan manera “denuncia” y “boycot” y aki a referi como culpabel e ex-minister di e gabinete Wever-Croes. Na prome lugar ta obvio cu e gabinetenan encabesa pa sra. Wever-Croes no a hasi nada pa alivia e barionan pega cu dump di e holor desagradable di dump. Dicon?
Den diferente articulo mi a denuncia e “Omerta” (silencio absoluto) cu tabata existi bow di e partidonan cu tin representacion den parlamento. Parce cu papia di dump tabata y ta ainda un topico cu ningun partido kier a kima nan dede cu n’e. Pakico?
E contesta ta simpel. Durante cu ami tabata minister encarga cu Serlimar y desperdicio mi a logra un solucion cu segun tur experto tabata oportuno, esta Bouldin&Lawson. Kico a sosode? E minister encarga cu desperdicio di e gabinete Eman y henter ministerraad cu entre otro Otmar Oduber a disidi di “boicotea” e proyecto. Partido MEP a keda keto, pasobra nan kier a aleha nan mes di mi persona, cu segun nan tabata e motibo dicon a perde e eleccion.
Lamentabel di henter e caso aki ta cu e gabinetenan di sr. Eman nunca a dedica atencion pa crea un solucion permanente pa maneho di desperdicio. Otmar Oduber, despues di a retira for di AVP, a funda e partido POR cu a yega na un acuerdo di gobernacion cu partido MEP. Ela exigi encargo di entre otro maneho di desperdicio. Dicon? Pasobra aki tin placa, manera historia a demonstra. Otmar a nombra un persona cu antecedente scur bira director di Serlimar. A huur un edificio na Pos Chikito di un otro amigo sponsor. A laga traha riba tur truck di Serlimar propaganda di personanan conoci den nos sociedad. A exigi pa parlamento acepta extra budget pa Serlimar sigui “djodjo”!Esaki sin cu e compania lo a entrega nan cuentanan anual manera ley ta exigi.
Riba dje a cumpra (corupcion) un incerinator, atrobe door di un amigo sponsor, cu no tabata adecua. Esaki despues cu a yega na un acuerdo cu e compania Johnson cu tabata encarga cu maneho di e “sludge” di RWZI. Tabata conoci caba cu RWZI a yega na un punto cu inversionan grandi tabata necesario pa evita un desastre ambiental cu lo a perhudica nos turismo. Tabata tin un poco fondo y Otmar a disidi di enbes di drecha RWZI a usa e placa pa atrobe faborese un amigo sponsor.
Cero di Teisha tabata un plan di e mesun Otmar. Den diferente articulo mi a adverti cu e forma cu tabata dera e “bales” den tera no tabata adecuado y cu esaki lo bira otro dump. Kico a sosode? Omerta, pues nada atrobe. Tur partido politico cu boca cera y a permiti Otmar sigui hasi su fechorianan. Otmar a hasta tribi di usa rapport di PAHO cu tabata indica e daño ambiental y medico cu dump lo nifica pa e habitantenan di e bario di Parkietenbos, pero no pa alivia e bario sino pa beneficio atrobe di amigonan sponsor.
Pues Otmar ta un di e autornan intelectual di e falta di maneho y hasta abuso di fondonan cu mester a wordo dedica na desperdicio. E tabata forma parti di e gobierno di Eman cu a boycot Bouldin&Lawson. Ela usa fondonan pa otro actividad cu drecha RWZI, a crea un desastre cu creacion di cero di Teishi y a desbarata Serlimar for di otro. Y kico e otro partidonan politico ta hasi? Manera di custumber nada pasobra nan sa cu nan ta co-culpabel di tur e desastre cu a tuma lugar y ta prefera atrobe omerta y laga Otmar hasi comosifuera e no a kibra un kopi. Mientras tanto habitantenan di bario ta sufri.
Observador Politico,
Candelario A.S.D. Wever
