SOLO DI PUEBLO ta studiando e rapport di Lotto, pa asina poco poco nos por haya sa mas, kico ta pasando den e fundacion. Nos a bin descubri cu Lotto no ta pagando su contribucion na deporte, unda cu ta mustra di tin un debe di 1 miyon florin cu Sport Subsidie.
Riba pagina 26 di e raport 2019 traha pa Grand Thorton, ta menciona un debe na fin di 2019 na Sportsubsidie Commissie di Awg. 988.196.
Pa cuminsa e raport 2019 ta contene un error, pasobra Sportsubsidie Commissie masha tempo no ta existi mas. Awendia ta Stichting Sportsubsidie Aruba. Mirando e debe di casi un Awg 1 miyon kiermen cu Lotto pa Deporte no ta cumpliendo cu su obligacion pa subsidia deporte. E no ta entregando e placa completo, sino, den pida pida, pa cual na final di 2019, tin un debe di 1 miyon.
Ta masha facil pa bisa cu mi ta subsidia deporte, pero mi no paga manera mester ta.
Debe accountant 316 mil florin:
Pa colmo di los colmos tambe riba mesun pagina 26 ta para cu na fin di 2019 Lotto pa Deporte debe hasta su Accountant mes un suma di Awg 316.250. Tambe nos a tuma nota cu e Accountant Grand Thorton no a firma e rapport di 2019 ( ainda). Porta pesey tambe e Accountant NO kier firma e raport 2019. Ta mas cu logico cu e kier su placa prome! Esta un berguensa nacional.
“Awor aki bo mester ta loco pa duna Lotto pa Deporte credito”, asina un bankero di renombre a contesta SOLO DI PUEBLO, despues di a lesa e rapport pa duna un opinion. Es decir, Lotto pa Deporte lo no por haya placa fia ningun parti, cu e rapportnan cu tin, cual ta mustra cu e ta cerca di bati bancarota.
