ORANJESTAD – Siguiendo e desaroyo den fundacion Lotto pa Deporte, mester remarca cu pa straño cu ta parse, pero e rapport 2019 di Grant Thornton fecha 31 di mei 2021 NO a wordo firma (ainda) door di e Accountant Independiente. Kiko por ta e motibo(nan)? Un analisis ta mustra lo siguiente.
Debenan
Riba pagina 6 den e balans di raport 2019 di Grant Thornton ta mustra cu Lotto tin na fin di 2019 un total di Awg 34.133.779 na debenan, mientras riba pagina 23 di e raport 2019 ta para cu na fin di 2019 Lotto pa Deporte tin solamente Awg. 1.359.885 na banco y cash in hand.
Cash na banco 1.3 miyon so!
Ta mas cu claro cu riba papel Lotto ta bancarota. Ta pesey mes Accountant ta hopi cauteloso di firma e raport 2019. Lotto na 2019, tabatin solamente 1.3 miyon florin den banco. Si compara e esaki cu 2009, na aña 2009, Lotto tabatin cash den banco, tanto na Aruba Bank y CMB, un suma di 18 miyon den cash!
Lotto a bira un cliente di hopi riesgo. E Accountant kier mira proof di gerencia cu realmente existencia di e fundacion ainda por?Cu otro palabra cu ainda por salba Lotto pa Deporte di un bancarota. E maneho desastroso aki a hinca Lotto pa Deporte atrobe tur den debe mescos cu a pasa na 2011.
Riba pagina 26 di e raport 2019 ta papia di un debe na fin di 2019 na Sportsubsidie Commissie di Awg. 988.196.
Pa cuminsa e raport 2019 ta slordig pasobra Sportsubsidie Commissie masha tempo no ta existi mas.Awendia ta Stichting Sportsubsidie Aruba. Mirando e debe di casi un Awg 1 miyon kiermin cu Lotto pa Deporte no ta cumpliendo cu su obligacion pa subsidia deporte. Ta masha facil pa bisa cu mi ta subsidia deporte, pero mi no paga manera mester ta.
Pa colmo di los colmos tambe riba mesun pagina 26 ta para cu na fin di 2019 Lotto pa Deporte debe hasta su Accountant mes un suma di Awg 316.250.
Porta pesey tambe e Accountant NO kier firma e raport 2019. Ta mas cu logico cu e kier su placa prome! Esta un berguensa nacional.Awor aki bo mester ta loco pa duna Lotto pa Deporte credito.
Gastonan di interes a subi cu 500 mil pa aña
Loke tambe ta hopi tristo cu riba pagina 32 di e raport 2019 di Grant Thornton ta mustra cu e gastonan di interes (fiansa) ta Awg. 901.893, mientras riba pagina 27 di e rapport 2009 di Ernst & Young ta para gastonan di interes ta Awg 472.641. Te pesey mes Lotto pa Deporte no tin placa pa subsidia deporte manera mester ta. Deporte no ta haya at all su fair share. Fundacion Lotto pa Deporte ta tur horca den debe!
Investigacion:
Sra Evelyn Wever-Croes como Formador di e gobierno nobo tin cu pidi Lotto pa Deporte pa responsabilisa, pasobra subsidio di deporte na Aruba ta den peliger y tambe e pagamento bek di e fiansa di gobierno.
Di otro banda mester bini un investigacion profundo riba e maneho financiero di e director Roland Tuitt bou di supervision di Silvio Janga pa wak si por tin mal maneho (mismanagement o wanbeleid). Y si ta asina mester por pone es nan responsabel paga e danjo (schade) haci na e Fundacion Lotto pa Deporte.
Haci manera a pasa na Corsou unda un fundacion di gobierno a hiba su directiva corte basa riba liability (interne- bestuurdersaansprakelijkheid).Esaki ta poni riba pagina 18 di e vonnis Curacao 201800860 fecha 25 november 2019. E directiva anterior mester paga na e fundacion di gobierno un suma di Ang 4.424.862. Ainda mester bini interes riba e suma aki.
Por ultimo un fundacion maneha asina malo no tin e derecho mas di por keda cu e permiso di loteria.
Patrick Paskel ta un di esnan cu a cobra masha hopi placa for di Lotto, unda recientemente a bin sali na cla, cu e tabata cobra 17.500 florin pa luna, y sin cu ningun hende sa ta kico ta e servicionan cu el’a presta na Lotto.
Pa un dinner, riba un solo anochi, Paskel a cobra 25 mil florin. Siendo cu tur hende sa cu Paskel no tin restaurant. Pues, ta kico a bay robes?
E Lotto Gate di Paskel lo continua y SOLO lo sigui analisa tur bukinan cu ta den nos poder.
