Fundacion Lotto pa Deporte no ta draai manera debe ser y ta pasando den un momento doloroso y di incertidumre. Asina e jaar rapport di 2019 ta bisa, traha pa Grand Thorton. E Loteria a perde placa na 2018 y 2019, cual tabata añanan bon, prome cu pandemia. Mirando e situacion di pandemia na 2020 y 2021, por spera cu e situacion a empeora.

Lotto na aña 2018 a hiba un perdida di casi 3 miyon florin, mientras cu na 2019, algo mas di 2 miyon florin. Mas cu claro cu Grant Thorton a mustra e directiva di Lotto riba e riesgo cu e fundacion ta coriendo, si e trend aki sigui.

Gastonan excesivamente halto:

Repasando algun di e gastonan, nos por observa cu na aña 2018, e Loteria a paga mas di 500 mil florin na abogado. Esaki mas sigur tabata pa bringa e caso contra gobierno, unda e miembronan di directiva nombra pa AVP, a re nombra nan mes como bestuur y no kier a entrega nan asiento na Minister Dangui Oduber.

Ademas nos ta mira cu pa cada aña, 4 miembro di bestuur ta gosa di un vergoeding di Afl. 130.000 pa aña, cual dividi den cuater ta Afl. 32.500 pa cada un, cu ta casi un suma di Afl. 3000.00 pa luna cu cada miembro di bestuur ta cobra. Esaki ainda ta sin conta tur e otro beneficio di luho cu nan tin, unda cu te hasta cada un tin un cuenta di telefon celular, riba cuenta di Lotto.

Por mira cu Canadian Bank note ta cobra diferente fee’s cu ta totalisa 11 miyon florin pa aña. Aparte di e acostumbrando comicion, Candian Bank Note ta gosando adicionalmente di un suma di 7 miyon florin pa aña, danki na e contract firma na 2011, unda a entrega e Loteria pa 15 aña, te 2026.

Lotto keto bay ta dunando na Sport Subsidies un suma di 4 miyon florin, cual suma ta wordo inverti den deporte di Aruba atraves di federacionnan.

Gastonan di Evento y PR pa 2018 ta na 300 mil florin. Aki ta unda compania di Paskel lo a cobra un dineral tambe.

Jaar rapport 2019 ta mustra duda cu Lotto por sigui y ta teme pa su existencia:

Den e jaar rapport riba pagina 12, por lesa claramente cu tin duda den e futuro existencia di Lotto. E debenan total di Lotto, ta mas grandi cu su assets ( propiedadnan). E rapport ta menciona: “The negative Foundation’s equity indicates that an uncertainty exists that may cast doubt on the Foundation’s ability to continue as a going concern.”

Pues tin incertidumbre den e abilidad di Lotto pa sigui dilanti.

E Loteria tin un debe di 30 miyon florin, y casi e no ta solvabel mas, segun nos por conclui di e rapport.

Nos no sa ki efecto e situacion financiero pesimo aki, for di 2018 y 2019, y aña di pandemia 2020 lo por tin riba e capacidad di Lotto pa sigui paga su premionan. E contribucion di Lotto na Sport Subsidie tambe ta coriendo awor peliger.

E unico ganador cu tin, ta Canadian Bank Note cu ta keda cu 11 miyon pa aña.

LEAVE A REPLY

Please enter your comment!
Please enter your name here