Ban crea mas consciencia y empatia pa cu bienestar di nos grandinan.
Mañan, 1 di oktober 2021, nos ta celebra dia Internacional di Personanan Adulto Mayor.
Dia 14 di december 1990 e Asamblea General di Nacionnan Uni a vota na fabor pa nombra dia 1 di oktober como Dia Internacional di Personanan Adulto Mayor. Na 1991 a celebra e dia aki pa prome biaha.
Meta di e dia aki ta pa crea consciencia riba retonan cu nos personanan adulto mayor tin diariamente, manera biehes y su consecuencia y limitacion, y abuso/maltrato di nos grandinan. Alabes e ta un día pa nos aprecia tur e contribucion y logronan cu nos personanan adulto mayor a haci pa nos sociedad y pais.
Mirando cu Gabinete Wever-Croes a decreta luna di oktober como luna di nos personan adulto mayor, laga nos pa un luna largo crea mas consciencia y empatia pa cu bienestar di nos grandinan.
Como parlamentario mi lo desea pa durante e luna di oktober nos trata topiconan manera:
- Soledad
- Falta di lugar di cuido
- E calidad di cuido pa nos grandinan
- Necesidad pa lugar di cuido specialisa
- Mas atencion pa Alzheimer y demencia y con e ta afecta e adulto mayor y nan famia
- Programa recreacional den diferente bario
A base di e topico mester bin cu un lista di idea, proyecto, proposicion pa maneho nobo of cambio den esaki etc. pa duna atencion concreto na e grupo meta aki. Nan merece!
Di awe caba mi kier a yama danki na tur nos adultonan mayor pa tur nan trabou, aporte y logro pa nos y nos pais.
