Maduro & Curiel’s Bank (MCB) cu placer ta anuncia nombramento di sr. Quinten Fraai como e Presidente y CEO nobo entrante 1 di juni 2025. Quinten tin experiencia bancario internacional extenso y a traha den diferente pais y cultura. Ademas di su experiencia profesional e tin lasonan personal y familiar cu nos islanan den Caribe Hulandes y un bon comprondemento di nos comunidadnan. Lionel (Chicu) Capriles II, Presidente y CEO actual di MCB, lo asumi un funcion nobo como miembro di e Hunta di Comisario, pendiente aprobacion di Banco Central, sigurando cu su experiencia y conocementu amplio di e Banco lo keda disponibel.
Quinten Fraai tin mas cu 30 aña di experiencia den servicio financiero. Actualmente e ta CEO di Monuta, un compania di seguro y servicio funeraria di renombre na Hulanda cu mas cu 1.5 miyon doño di polisa. Anteriormente e tabata CEO di NN Insurance Belgica y Luxemburg. E tin un carera bancario exstenso di mas cu dos decada cu ta inclui funcion di liderazgo clave manera co-CEO di ING Direct na Hapon, General Manager di Direct Channels na ING Bank Belgica, Director di Savings & Mortgage Operations pa ING Direct den Reino Uni y EVP Operations na ING Direct Merca.
Islay McGlynn, Presidente di e Hunta di Comisario di MCB ta declara: “MCB ta hunga un rol clave den e economia y e comunidad di nos islanan den Caribe Hulandes y nos tabata busca un líder cu ta compronde e responsabilidad aki. Quinten tin experiencia amplio riba tereno bancario, crecementu digital y strategia, pero mesun importante ta tambe cu e ta comparti e balornan di MCB. Nos tin pleno confiansa cu e lo lidera nos Banco cu vision y dedicacion. Mi ta hopi contento tambe cu Chicu lo join e Hunta di Comisario. Esaki ta sigura cu MCB por sigui beneficia di su experiencia y conocemento, mientras nos ta sigui bay dilanti.”
Lionel (Chicu) Capriles II ta añadi: Mi ta yama Quinten un caluroso bonbini na nos islanan den Caribe Hulandes. E ta e persona adecua pa mantene nos balornan di famia halto. For di aña 1916 e balornan aki ta forma e curason di nos Banco. MCB ta fuerte, resiliente y bon posiciona pa futuro y mi tin pleno confiansa cu Quinten lo sigui traha riba e fundeshi solido aki. Mi lo sigura personalmente pa haci un transicion facil y bon. Den mi funcion nobo den e Hunta di Comisario, mi ta spera cu anticipacion pa sostene e y nos Banco den e siguiente trayectoria di desaroyo.
Quinten Fraai ta remarca: “Mi ta sinti mi sumamente honra pa join MCB. Un Banco cu tin un rol asina importante den Caribe Hulandes. Cu mi tata cu a nace y crece na Corsou, semper m’a sinti un conexion fuerte cu e islanan. M’a desaroya un aprecio p’e cultura y particularmente p’e sentido di comunidad cu ta haci e pais asina special. Mi ta compronde con crusial MCB ta pa e hendenan y negoshinan den e región aki. Lasonan fuerte ta forma e base di tanto e comunidaf como negoshinan y lo mi haci mi maximo pa stimula e relacionnan balioso y pa huntu cu e team nos proteha y mantene MCB su herencia di confiansa, stabilidad y servicio.”
Nombramento di Quinten ainda ta mara na aprobacion di e accionistanan, cu ta programa pa tuma luga mas na fin di e kwartaal aki. Entrante prome di juli 2025 e Hunta di Maneho di MCB lo consistí di Quinten Fraai como Managing Director y Presidente & CEO, Bill Said como Managing Director y Group Head y Cris van Kempen como Managing Director y Chief Risk Officer. E nombramento di Cris (cu a keda anuncia di 23 di januari 2025), ainda y manera custumber ta mara na aprobacion di regulado y e accionistanan.
