Mescos cu tin Chavo del 8, nos tin na Aruba Magaly 27. Dicon 27? Pasobra tin un total di 27 punto cu Banco Central a dicta, cu Seppa/Cappa a mal maneha.
Pa Banco Central fluit bo riba 27 punto di mal maneho, di cosnan cu bo mester a haci, pero no a haci, ta realmente tristesa.
SOLO DI PUEBLO a bay check si Magaly 27 a duna e miembronan e carta cu e 27 puntonan y pa sorpresa e miembronan a bisa “NO”.
E miembronan a bisa cu e bestuur a pone nan cu la espalda contra la pared, pasobra si e miembronan a dicidi pa baha e bestuur, lo e cos a tranca mas peor ainda.
Pues, miembronan mester a accepta tur cos, estilo guli manda bao.
Ta realmente asombroso cu CAPPA/SEPPA ta saca un comunicado unda nan kier deskita atencion di 27 punto di mal maneho, y culpa prensa.
Prensa ta hasi su trabao di cuestiona un mal maneho, segun e carta di Banco Central di 14 di januari, cu NAN tin scondi bao kokodek. MIEMBRONAN mester exigi un copia di e carta, pa asina e berdad sali na cla.
Sinembargo nan ta sinta riba e carta, mescos galinja ta cuida y keinta webo, y no kier lanta pe carta sali.
Ta comosifuera e reunion yama dia 23 di Maart, tabata un reunion pa brainwash: No kere prensa, kere bestuur so! Pero unda e carta ta? Unda e 27 puntonan ta? Sacanan y pone nan publicamente pa pueblo haya sa y miembronan haya sa e berdad.
Un bes mas ta rechasa den forma categorico, con Magaly 27 kier sconde e 27 puntonan di mal maneho y riba dje, tira culpa riba prensa!
