Fraccion di MEP den reunion cu maestronan laborando den scol basico, a expresa nan malcontento cu e minister di enseñansa.
Aparte di kehonan cu e minister ta mete directamente den casonan individual di alumno, awor tin keho di mas conflicto di interes. E minister ta creando un cartel pa loke e veld ta sinti como un pelea contra e veld.
STRUCTURA SALARIAL
Maestronan ta hopi malcontento cu e proyecto aki no ta cla ainda siendo cu e gobierno y e minister di finansas ta broma cu tin surplus y cu e surplus ta bira mas grandi. Maestronan no ta compronde dicon e ora gobierno no por cumpli cu nan. Maestronan ta condena cu e minister di enseñansa en bes di continua cu gobernacion, ta parse di kier stop tur cos, sin worry cu maestronan ta bira victima. Locual cu a crea mas rabia ta e hecho cu coordinadornan den Cocolishi y hasta chauffeur di minister ta gana mas cu maestronan.
SCARSEDAD DI MAESTRO
Mientras cu tur hende sa cu tin scarsedad grandi di maestro, e minister ta saca maestronan cu ta para dilanti di klas, pa sea bira coordinador – cu salario astronomico – of pa asumi otro cargonan, lagando un bashi abrupto na scolnan.
Y esun cu tribi di reclama ta haya un minister mandona y gritona.
Fraccion di MEP su tarea ta pa scucha loke ta biba den e veld y trece e preocupacionnan dilanti den speransa cu gobierno por recapacita. Fraccion di MEP lo manda preguntanan pa e minister duna aclaracion.
