E alcalde di New York, Zohran Mamdani, a anuncia diahuebs un sorteo di 1.000 entrada destina pa e habitantenan di e ciudad pa asina nan por mira e partidonan di e Mundial di Futbol 2026 pa solamente 50 dollar. E premio ta inclui transporte gratis pa bay y bin for di e stadion MetLife, caminda lo tuma luga e partidonan di e sede New York/New Jersey.
“Nos a bisa cu nos mester a haci e acceso pa e partidonan aki mas barata pa e habitantenan di New York, y awe nos ta haciendo exactamente esey,” Mamdani a declara durante un conferencia di prensa. El a agrega cu e meta ta “garantisa cu e hende trahado por asisti na un di e eventonan deportivo mas grandi di mundo.”
Lo parti e entradanan aki entre shete partido: cinco partido di e fase di grupo y dos di e fase eliminatorio.
New York/New Jersey lo ta un di e sedenan principal di e Mundial di Futbol 2026 y lo ricibi den e prome fase seleccionnan manera Brasil, Francia, Ecuador y Inglaterra. Tambe e lo fungi como escenario pa partidonan di eliminacion, incluyendo e gran final di e torneo.
Segun Mamdani, lo tin rond di 150 entrada disponibel pa cada partido, y cada un lo costa 50 dollar, un prijs cu el a compara na un manera chistoso cu “cinco koffie cu lechi na New York.”
E alcalde a destaca cu e echo di por mira un partido no ta depende solamente di e prijs di e ticket, sino tambe di e gastonan di biahe. Pa e motibo ey, e ganadornan lo por biaha gratis den autobus for di New York te cu e MetLife Stadium na New Jersey.
Lo asigna e entradanan aki via un sorteo cu ta “exclusivo pa residentenan di New York”, cual lo cuminsa dia 25 di mei. E personanan interesa lo por inscribi un biaha pa dia, y e proceso lo tin un limite di 50.000 solicitud diario.
Mamdani a sigura cu e oportunidadnan pa haya un entrada “no ta depende di ken bo conoce,” y a afirma cu e alcaldia lo verifica e residencia di e participantenan pa garantisa cu ta solamente habitantenan di New York por cumpra nan.
“Nos no kier resale (rebenta), nos kier habri e torneo pa trahadornan cu di otro manera no por a permiti esaki,” e alcalde a sostene. El a agrega cu e entradanan lo ta “intransferibel” y lo wordo entrega directamente na e ganadornan.
E ticketnan pa e Mundial no tin un solo prijs fiho y a wordo saca na benta den diferente fase, manera e ‘categoria 4’ cu tin un prijs mas accesibel. Sin embargo, den e ultimo simannan aki a yega di mira entrada publica riba plataformanan di resale pa sumanan gigantesco, den algun caso superando un miyon dollar.
