Tabata na inicio di augustus 2025, cu Minister di Husticia mr. drs. Arthur Dowers, hunto cu directora di DIMAS, mr. Kathy Ruiz-Paskel, a anuncia un maneho temporal pa atende cu e demanda halto di e mercado laboral. A introduci e maneho cu a hiba e nomber di Hunto pa Progreso cu tabata dirigi specificamente riba e grupo di personanan indocumenta cu ta biba riba nos isla pero cu a drenta di forma legal via aeropuerto. Segun calculacionnan di Ministerio di Husticia, a premira cu lo registra cinco mil persona durante e trayecto di Hunto pa Progreso.
Dialuna mainta, Minister di Husticia Arthur Dowers a duna un relato na prensa den cual a comparti data acumula y a duna resultado preleminar di e registracion pa permiso di trabao.
Pa trayecto uno di Hunto pa Progreso cu ta personanan indocumenta pero cu dunado di trabao, DIMAS a registra casi 6100 peticion.
Pa trayecto cuater, cual a keda anuncia na comienso di oktober, 1409 persona sin status legal y sin dunado di trabao a registra pa un permiso laboral transicional pa maximo 1 aña.
Un di e rekisitonan pa trayecto cuater tabata cu e aplicante mester a yena su capacidad pa asina crea un banco di data, y asina purba acopla dunadonan di trabao cu e candidatonan cu mas ta cumpli cu e profiel laboral di e companianan en busca di empleado.
Ainda tin un cantidad di aplicante, cu despues di a ricibi nan orden di pago na 2025, pa un of otro motibo no a cumpli cu esaki, pa cual por resulta den un anulacion di e peticion di permiso y e aplicante lo por perde e oportunidad unico cu Gobierna a duna pa medio di Hunto pa Progreso.
Na final di e conferencia di prensa, Minister Dowers a anuncia cu a extende e periodo unda cu esnan cu ainda ta indocumenta na Aruba, por sali boluntariamente sin cu nan ta haya un prohibicion di entrada. E dispensacion aki ta vigente te cu dia 31 di januari 2026 y e mandatario di Husticia a sigura cu despues di e periodo aki, lo intensifica controlnan migratorio.
