Investigadornan di e Observatorio Astronomico Nacional di Hapon a desaroya un mapa di Milky Way atrabes di e informacion haya durante e ultimo 15 añanan pa e proyecto di radioastronomia VERA.

Specialistanan a calcula e posicion di Tera den relacion cu e “black hole” den centro di e galaxia spiral unda cu e sistema solar ta, yama “Sagitario A*”.

Segun astronomonan, na 1985, nos planeta tabata ubica na 27.700 aña luz di e fuente di radius hopi compacto aki y briyante, mientras cu e reciente datonan ta ubik’e na 25.800 aña luz.

Cientificonan a splica cu Tera a acelera 7 kilometer pa seconde y a acerca mas of menos na 2 mil aña luz na e black hole supermasivo. Sin embargo, nan a sigura cu “no tin nada pa preocupa” y a agrega cu “esey no ta nifica cu nos planeta ta sink den e black hole.”

Di su parti, specialistanan di e Agencia Espacial Europeo (ESA), a crea nan propio mapa den 3D di e Milky Way, uzando e datonan di e sonda Gaia.

Expertonan a afirma cu durante e ultimo dos añanan, nan a logra obtene informacion nobo riba mas of menos 200 miyon di strea y actualmente ta dispone di datonan detaya riba mas di 1800 miyon di obheto espacia.

“E datonan nobo di Gaia a permiti e astronomonan rastrea diverso poblacion estelar mas antiguo y mas hoben te na e rand di nos galaxia, e anticentro galactico,” nan a subraya den un comunicado emiti diahuebs ultimo.

Tras di a crea modelonan computarisa di e galaxia, cientificonan a yega na e conclusion cu e disco di Milky Way lo crece cu tempo, a medida cu streanan nobo nace.

“E datonan nobo ta permiti nos mira e restonan di e antiguo disco di 10 mil miyon di aña y asina determina nan menor extension compara cu e tamaño actual di e disco di e Milky Way,” nan a agrega.

LEAVE A REPLY

Please enter your comment!
Please enter your name here