Marco Berlis (MEP) ta presenta un analisis critico riba e prome siman di Gabinete Eman-III. Pa pueblo compronde e situacion actual, mester refleha riba e politica y promesanan di AVP y Futuro cu a hiba den oposicion y durante e campaña prome cu eleccion 2024. Nan a hiba un politica atacando surplus, rijkswet, y a papia di medida y pobresa constantemente. Pero kico nos ta observa awe den apenas 50 dia di nan gobernacion? Apesar di a hereda un surplus di 488 miyon florin, e gobierno nobo a dicidi di implementa varios medida di austeridad. Ora cu nan a trata e presupuesto 2025 den Parlamento, nan a presenta un nota di cambio cu ta corta drasticamente den departamentonan cu ta duna servicio esencial na comunidad y ta tumando decisionan cu ta afecta e normanan di bon maneho financiero di nos pais.
E contradiccionnan entre promesa y accion ta notabel:
1. Minister di Finanzas y Economia; A promete pa mehora poder di compra
durante campaña, pero a hisa prijs di gas cu 30%.
2. A promete cu lo yuda e homber chikito, pero a corta 6.2 miyon florin di subsidio na sector social y husticia.
3. A promete mehoracion di educacion, pero a corta 2.9 miyon for di e departamento di
educacion.
4. A promete cu lo reduci gasto di bureau ministerial cu 8.5 miyon, pero a elimina e plan aki for di presupuesto 2025.
5. Despues di critica e gobierno anterior pa 7 aña riba e tema di abuso di mucha, e gobierno nobo
a corta 3 miyon di subsidio pa fundacionnan cu ta combati abuso di mucha y salud
mental.
6. A promete mehoracion di condicion di bida, pero a corta 19.7 miyon di FCCA, poniendo 150-
200 cas social na peliger y posiblemente causando aumento di huur.
7. Mike Eman a anuncia aumento di belasting pa e sector hotelero, locual lo haci nos turismo mas costoso.
8. Gobierno nobo no a cumpli cu “deadline” pa entrega e concepto di Rijkswet nobo, y awo pueblo lo mester paga 1.4 miyon florin extra pa luna!
9. A promete pa duna remedinan bek na pensionado, sinembargo di 242 remedi kita for di e lista
a pone solamente 129 bek! Pensionadonan ta man na cabes!
10. Dowers y Cecilia a dicidi di kita DPL pa vacatura y asina eliminando e yiu di tera su posibilidad di hay un trabao prome cu un stranhero.
11. Costo di bida subiendo drasticamente; Gobierno a admiti cu nan no tin un plan pa mitiga “Tariffs” di 10% di Presidente Trump.
12. Gobierno nobo ta kita posibilidad pa pone un Arubano como CEO di aeropuerto y ta regala Schiphol Groep 6 miyon florin extra pa aña!
13. Gobierno Futuro/AVP no a kita e suma di lease pa auto di ministernan for di presupuesto. Kiermen nan lo bay usa e fondonan aki.
14. Premier y Staatssecretaris di Hulanda a bisa Mike Eman cu Hulanda no lo duna ni un florin pa e findo di inversion y cu Aruba mester yene cu su mesun fondonan.
E conclusion ta demostra claramente cu den apenas 50 dia di gobernacion ya pueblo ta hayando un sabor hopi amargo di e medidanan di Mike Eman y Gerlien Croes, apesar cu tin un surplus di 488 miyon florin. Comunidad di Aruba lo por imagina kico nan lo haci si no tabata tin surplus? E storia di AVP y AVP+ (FUTURO) ta bolbe ripiti; “Haci hopi promesa, pero keda sin cumpli atrobe.”
