E intento di Marisol pa usa e caso aki pa crea un narrativa politico ta irresponsabel.
Diahuebs merdia Marisol Tromp a trece ponencianan dilanti, riba dos caso, di SSA y di Arubahuis, di cual e no tin rason.
CASO SSA:
Den e prome caso mester confirma cu SSA mes a presenta un keho penal, loke ta mustra cu e proseso penal corespondiente ya ta den marcha. Pues, no ta corecto pa usa un incidente individual pa converti esaki den un espectaculo politico, insinuando cu Minister Endy Croes no a cumpli cu su debernan di entrega keho.
Loke Marisol a declara cu Minister Endy Croes no a entrega keho, y kier blame cu tin scondemento, a backfire pisa riba Marisol, pasobra tur e espectaculo cu el’a haci na Ministerio Publico di entrega documento, TUR Ministerio Publico tabatin tin promer cu Marisol a entreganan.
Esaki ta mustra un bes mas, cu Minister a actua corecto den e caso aki, no manera cu Minister di AVP Mike de Meza a haci na 2013, ( cu sosten di Marisol den parlamento), ora cu De Meza a nenga di entrega keho di ladronicia den Casino di Lotto na airport y a declara den parlamento cu a yega na areglo cu esnan envolvi e tempo ey, kendenan tabata su campañador. E tempo ey Marisol no a sali bisa nada!!
Caso Arubahuis:
Ademas, e ponencia di Marisol cu no a presenta un keho penal den e caso di ArubaHuis ta completamente falso. E retorica aki ta simplemente un otro tactica pa confundi e publico y crea desconfiansa, pero e hechonan ta mustra otro.
Promer Minister Evelyn Wever Croes den caso di Arubahuis a tuma tur accion pa atende cu e situacion y tambe a pone un keho na Ministerio Publico, te cu a conduci cu esnan envolvi a wordo deteni y interoga pa landsrecherche. Of Marisol kier nenga esaki tambe? (Ministerio Publico mes a confirma cu keho a wordo entrega: Ministerio Publico a confirma cu tin keho penal contra ex-minister Besaril – Bon Dia Aruba | Noticia di Aruba)
E intento di Marisol pa usa e caso aki pa crea un narrativa politico ta irresponsabel. SSA a tuma e medidanan rapido y necesario, a actua corecto, a investiga loke a pasa y a entrega keho. E acusacionnan sin fundamento aki di Marisol ta simplemente pa busca atencion y crea un ambiente di conflicto unda no mester tin.
Enbes di crea drama, lo mihor ta pa laga e proseso di husticia cana su caminda y laga e sistema hasi su trabou, enbes di politisa un asunto penal serio.
