Informacion cu ningun hende kier confirma, pero informacion persistente ta sigui drenta, cual ta bisa cu Marisol ta bao investigacion di actonan coruptivo. Algun tempo pasa, a sali na lus di dia cu tin un caso andando contra su persona, cu a wordo duna nomber CASO ALOE. Aloe no ta un nomber cu a cay di shelo, pero kisas por ta referi na varios terenonan di huurgrond di 30 mil m2 cu Marisol a otorga contra tur regla y maneho. Despues a bisa cu e caso no yama mas ALOE, pero KUKWISA. Nada straño, pasobra ta keda indica cu tin di haber cu violacion y delito den otorgamento di tereno. SOLO DI PUEBLO a puntra Ministerio Publico, pero nan a contesta di no sa nada. Sinembargo fuentenan hopi serca di Marisol a skiribi riba red social, indicando cu e bishita di Marisol ta veridico y mester warda pa laga e caso desaroya. Ta di compronde cu den casonan asina, tur cos ta wordo haci den silencio, pero ta yega ora si pa Ministerio Publico por asumi su responsabilidad y duna informacion. Ministerio Publico di Aruba ta uno di esnan di mas keto den Reino Hulandes, cu semper ta mantene silencio.
