Dos encuesta a duna Marisol 0,0 asiento
Marisol Tromp, lider di partido politico Mas, ta confrontando un crisis profundo di confiansa di parti di e electorado arubano. Encuestanan recien ta refleha un caida considerabel den e sosten cu su partido a disfruta den ultimo eleccion, poniendo dudanan serio riba suncapacidad pa haña representacion den Parlamento den eleccion di 6 di december.
Segun e resultado di e encuesta publica pa Noticias Cla, e partido MAS no a logra ni si kiera haña 1% di e voto. E resultado devastador aki ta traduci directamente den un proyeccion di 0 asiento den Parlamento, indicando e falta di sosten popular pa e liderato di Tromp.
Pa añadi na e situacion, un encuesta radial tambe a duna e mesun resultado, comprobando cu e partido no lo logra haña representacion legislativo.
E panorama aki ta un fuerte contraste cu loke a pasa den e eleccion ora Marisol Tromp, cu un retorica yen di fantasia y promesanan exagera, a logra haña dos asiento den Parlamento. E victoria ey, aparentamente lo keda di corto duracion, pasobra confiansa di e votantenan a disparse completamente, lagando Tromp den un posicion politico hopi fragil.
Segun e encuestanan nobo, e probabilidad pa Marisol Tromp haña un asiento den e eleccion venidero ta casi nulo. E rechaso masivo aki ta refleha e descontento di e votantenan cu e tacticanan di Tromp den pasado y su falta pa ofrece un vision politico cu ta realistico y conviciente.
E futuro di partido “Más” y e liderato di Marisol Tromp ta claramente den peliger. E caminda pa recupera e sosten di e publico ta parce poco probabel, y segun e encuestanan, si no tin un cambio drastico, e partido lo keda afor di e mapa politico di Aruba den e eleccion di december.
E siguiente simannan lo ta crucial pa partido “MAS”, pasobra nan abilidad pa reconecta cu e votadornan lo determina si nan tin algun futuro den Parlamento.
E kiebro den partido MAS, ta data for di momento cu Juffrouw Gun a horta stoel di Solangel Lacle. A firma acuerdo pa despues kibra su propio acuerdo y horta e stoel. For di e momento ey, Marisol no a mustra liderasgo pa pone ordo den su partido, pero a prefera pa accpeta e violacion di acuerdo, cu a keda mustra su incapacidad como lider.
