ORANJESTAD – Mientras e concierto mes y su musica a termina, un ola di preocupacion ta keda resona den e sector turistico y comercial di Aruba. E reciente concierto internacional, supuestamente cu meta pa eleva nos prestigio, a resulta den un les amargo riba kico ta pasa ora marketing profesional wordo reemplasa pa improvisacion, falta di control y maneho di amigo.
E biaha aki, e critica no ta bin solamente di e ciudadano comun, sino di observadornan cu ta mira con e imagen di Aruba como un “Destino di Luho” ta wordo poni na peliger pa e maneho cuestionabel di Aruba Tourism Authority (ATA) y e organisadonan envolvi.
Downgrade di e marca “Aruba”
Aruba a traha pa decadas pa posiciona su mes como un destino exclusivo. Sinembargo, ora e ticketnan oficial di un evento “high-end” wordo regala na gran escala pa despues termina den benta barata riba Facebook, ta manda un mensahe fatal: desesperacion.
Ora bo regala e producto, bo ta bisando e mercado cu e producto no tin balor. E impacto psicologico riba e turista cu a paga full prijs pa bin Aruba ta devastador. Con nos por hustifica prijsnan halto den nos hotelnan y restaurantnan, si e mesun autoridadnan ta permiti pa e balor di nos eventonan internacional wordo lastra den e “black market” digital?
E “Ambassador” cu a bira re-bendedor
E concepto di uza studiante como “embahador” por a zona bunita riba papel, pero den practica e tabata un falta di vision total. Sin un contracto di responsabilidad of un sistema di digitalizacion pa e ticketnan, ATA a habri porta pa un chaos di benta ilegal.
En bes di promove e isla, hopi di e “embahadornan” aki a wordo converti den re-bendedornan di oportunidad. Esaki no solamente ta afecta e caha di e evento, sino e ta crea un precedente peligroso: e fondonan publico, destina na promocion internacional, a termina financiando ganashi personal di un grupo.
Unda e profesionalismo a keda?
Un evento di e magnitud aki mester wordo maneha pa expertonan cu trayectoria. E falta di transparencia riba cua compania a ricibi e contracto y bao di ki condicionnan, ta lanta e sospecho di semper: Tabata un decision basa riba merito of riba afinidad politico y personal?
E silencio di ATA dilanti e preguntanan aki ta pisa mas cu e musica mes. Un institucion cu ta maneha miyones di florin di “pagador di belasting” no por permiti su mes di wordo asocia cu un concierto fracasa den su planificacion.
E peliger di e ROI
E defensa lo ta e “exposure” cu Aruba a haya. Pero den e mundo moderno di data, e “exposure” no ta paga recibo. Si no por demostra cu e concierto aki a genera un subida real den gasto di turista of den reservacionnan nobo cu no tabata existi caba pa e high season, anto nos ta papia di un fayo structural den maneho.
Aruba mester stop di hunga “organisado di fiesta” y cuminsa actua manera un destinacion competitivo. E inversion den turismo mester wordo uza pa crea balor largo plaso, no pa tapa buraco di un planificacion swak cu a laga un mal resultado.
ATA no kier duna cara, berguenza ta mata ban
E concierto aki mester keda marca den historia no pa su cancionnan, sino como e momento caminda e comunidad a exigi un stop na e falta di transparencia. Si ATA no por duna cuenta detaya di cada florin inverti y di e fracaso den e distribucion di ticketnan, e ora ta momento pa un cambio structural den e forma con nos ta maneha nos industria principal.
Aruba su marca ta bal mucho mas cu un par di ticket regala riba Facebook. Ta ora pa nos cuminsa trata nos isla cu e respet y e profesionalismo cu e merece.
Na final; ken den ATA ta bay asumi responsabilidad pa e fracaso? E miembronan di bestuur? Porcierto un a baha na awa mesora ? Of e directora? Kico esaki ta? Marketing of maneho di amigo ?
