Dialuna mainta Corte di Husticia a trata e caso penal cu Ministerio Publico a cuminsa contra e homber Venezolano J.I. (54) biba na Aruba, su yiu homber G.I. (29), e señora di J.I., G.M.( 58), e homber Colombiano G.G. (44) biba na Aruba. E grupo aki ta wordo sospecha di a exporta 27.724 gram di cocaina den un motor di coriente pa Hulanda.
SOLO DI PUEBLO por a compronde cu Fiscal a baha pisa riba e grupo caminda a exigi 58 luna di prison pa e homber G.G. y pa e famia J.I., e dama G.M. y e yiu homber G.I., a exigi 53 luna di prison.
Fiscal ta acusa e grupo aki cu riba 25 Juli 2024 hunto, a exporta un lote di 27.724 gram di cocaina. Fiscal ta haya cu G.M., G.G. y J.I. lo ta envolvi den preparacion. G.I. tabatin droga den su poder.
LOTE DI COCAINA DEN MOTOR
Tratamento di e caso aki a dura di mainta te den oranan di merdia. Hues a mustra cu dia 1 Augustus 2024, Douane durante control di un container cu mester a bay Hulanda, a descubri un lote di droga den un motor grandi. E cacho anti droga a reacciona y a bin haya pakinan di cocaina scondi den e motor. En total e droga a pisa 27.724 gram.
Ta sospecha cu G.G. ta envolvi den esaki. Hues a mustra cu G.G. no a duna declaracion na Polis. Hues a puntr’e si e ta keda sin papia of awor e kier papia? G.G. a bisa Hues cu awor e ta papia. For di e interogacion extenso haci di Hues por a compronde cu G.G. a bisa cu e tabata mediador entre un Hulandes, Colombianonan y e homber J.I. E mester a percura pa e droga ta den e motor cu lo mester wordo manda Hulanda. E plan tabata cu e motor lo wordo manda for di Hulanda pa Aruba y despues lo manda e motor bek Hulanda.
J.I. a bisa cu G.G. a yam’e for di Hulanda cu e mester a busca un motor di coriente. Na Aruba J.I. a bay busca e motor y a hib’e pa G.G. Despues ta resulta cu e motor di coriente su voltage ta 440 Volt cu ta mucho halto. A dicidi cu mester manda e motor bek. Esey tabata e plan pa asina manda e motor bek cu e lote di cocaina.
Sinembargo e plan a fracasa ora cu Douane a contra e container den cual e motor tabata. Cacho anti droga a reacciona y a bin haya e pakinan di cocaina scondi den e motor.
TIRAMENTO DI CULPA RIBA OTRO
Hues a mustra cu J.I. a puntra G.G. si e motor ta carga cu droga y cu mester percura cu no tin droga. J.I. a bisa Hues cu e tabata sospecha, pasobra cu a dicidi di manda e motor bek asina liher. J.I. a sigui bisa cu el a kere palabra di G.G. cu den e motor no tabatin nada y pa manda e motor Douane pa e wordo exporta bek. Segun J.I., e tabata bou menaza. Hues a puntra G.G. con e droganan a wordo hinca den e motor. El a bisa cu ta e Hulandesnan a haci’e. El a bisa cu el a compronde cu ta 20 kilo a wordo hinca. El a haya 20 mil florin y 30 mil florin. El a bisa cu pa e Colombianonan ta mey miyon dollar nan a perde cu e droga no a bay Hulanda. El a bisa cu un homber, un tal U., tabata esun encarga cu e Colombianonan.
Hues a mustra cu via mensahenan di cellular cu Polis a haya, por a compronde cu na dado momento e Colombianonan a rabia y tabata menaza. G.G. a bisa nan cu e tambe ta arma. El a bisa Hues cu el a bisa asina pa mustra nan cu nan no por presion’e.
Hues a mustra cu investigacion ta mustra cu e compania ta riba nomber di G.I. G.I. a bisa Hues cu e compania ta riba su nomber pero e no ta haci nada cu e compania y cu ta su tata J.I. ta maneha e compania. Segun G.I., e compania tin 9 aña andando y nunca tabatin problema. Awor cu J.I. a bay deal cu G.G., a bin problema. Hues a mustra cu tin hende a mira cu G.I. tabata hunto cu su tata ora J.I. a haya e motor. El a bisa cu su tata J.I. a busk’e den Playa cu e pick up pero e no tin nada di haci cu e caso aki. Hues a mustra tambe cu e motor, den cual a haya droga, tabata riba nomber di G.I.
Hues a bisa e dama G.M., señora di J.I y mama di G.I., cu tabatin combersacion entre G.M., G.G. y J.I. tocante e importacion di e motor. E tabata haya instruccion kico pa haci. E tabata manda mail. Segun G.M., e no a mira e motor y mucho menos sa cu tin droga. El a bisa Hues cu el a confia den G.G. cu lo tabatin un negoshi andando pero awor ta resulta cu tin droga scondi den e motor. El a bisa cu el a mira papelnan tocante e motor pero no sa nada mas. Hues a puntra G.M. cu e no a haya straño cu e ta haya instruccion cu e mester bisa cu e motor ta pa J.I. El a bisa cu e tabata yuda su casa J.I. den e negoshi y tabata haci loke J.I. bis’e pa haci.
SERA PA DROGA Y AWOR OTRO CASO DI DROGA
Hues a mustra cu G.G. tin un carchi di castigo. Na Februari 2025, G.G. a wordo condena na 30 luna di prison pa un caso di 700 gram di cocaina den post cu mester a bay Hulanda entre April y Juni 2024. Corte di Husticia a considera G.G. como esun encarga cu e traficacion y cu e no a coopera cu e investigacion.
Relaciona cu e caso actual, ta asina cu famia J.I., G.I. y dama G.M. tin mas o menos 11 luna encarcela.
FISCAL
Fiscal ta haya legalmente proba exportacion di droga. Ta trata di un cargamento grandi di cocaina. Fiscal ta haya cu G.G. a mal usa compania di J.I. pa exporta cocaina pa Hulanda. Fiscal a exigi pa G.G. 58 luna di prison, pa J.I., G.I. y G.M., 53 luna di prison. E cellular di J.I. y documentonan relaciona cu e motor, e pick up mester keda confisca. E cellular di G.I. por wordo debolbe. E droganan si lo keda confisca. E cellular di G.M. mester keda confisca.
Por a ripara cu J.I. no a keda nada contento cu e exigencia di Fiscal. E tabata hopi tristo y a pidi Hues pa laga su señora y su yiu homber liber ya cu nan no tin nada di haci cu e caso aki.
ABOGADO
Mr. J.Tromp a bisa Hues cu Ministerio Publico por a trata e dos casonan penal di G.G. hunto. El a remarca cu si conta e 30 luna cu G.G. ta sintando cu e 58 luna, ta bira 88 luna di prison. E abogado a enfatisa cu esaki ta exagera y rediculo. Na opinion di e abogado, door cu G.G. a wordo menaza, e no a papia nada na Polis. Den Corte, G.G. a dicidi di papia. Hues a remarca cu serca dje, si keda keto, esey lo no ta causa cu lo subi castigo. Keda sin papia ta un acusado su derecho y mester respeta esey. Abogado ta haya cu G.G. no tabata esun cu tabata guia. G.G. tabata esun cu a wordo acerca door di Hulandesnan y Colombianonan cu e debe placa di droga. E abogado ta haya cu tur hende tabata sa nan funcion. El a bisa cu no ta G.G. a paga pa e motor bin Aruba sino J.I., kende lo haya su placa bek. E abogado ta haya cu tur hende mester haya e mesun trato. G.G. kier haya castigo husto y no 88 luna en total. E abogado ta haya cu husto lo ta si castiga 12 luna of algo mas. E abogado a mustra Hues riba un sentencia den un caso di 100 kilo, caminda e cabezante a wordo condena na 4 aña di prison.
Mr. Mohamed a bisa Hues cu aki ta trata di un famia cu a wordo usa. E mas cu 27 kilo di cocaina tabata scondi den e motor di coriente. Investigacion a mustra cu ta G.G. tabata envolvi y a regla e transporte di droga. E abogado a sigui bisa cu e pregunta ta si e famia J.I., G.I. y G.M. tabata sa cu tin droga den e motor. El a bisa Hues cu e compania ta riba nomber di G.I. pero e no ta haci nada. Ta e tata J.I. tabata haci tur cos. G.I. tabata sa cu mester manda un motor bek Hulanda. J.I. a pidi G.I. si e kier bay hiba e motor. E abogado a bisa Hues cu G.I. no tin nada di haci cu e importacion di e motor. J.I. y G.M. tabata envolvi den esaki y cellularnan ta papia pa nan mes. G.I. no tabatin ningun combersacion riba esaki riba whatsapp y tampoco cu G.G. E abogado ta haya cu mester declara G.I. liber di e droga den motor. El a bisa cu G.I. a admiti di tabatin droga cun’e. E abogado a pidi Hues pa laga G.I. liber en espera di decision di Hues riba e caso.
Pa loke ta e motor, J.I. y G.M. tabata coresponde cu G.G. Ta asina cu J.I. y G.M. no tabata sa cu tin droga den e motor cu mester a wordo manda bek. E abogado ta haya cu J.I. y G.M. a wordo usa door di G.G. Abogado a mustra cu ningun caminda ta wordo papia si J.I. y G.M. lo haya pago. Polis a haya den cellular di G.G. combersacion cu e e homber U. tocante e motor. Ningun caminda por mira cu J.I y G.M. a papia cu U. Tambe tin otro combersacion entre G.G. y un dama tocante e motor. No tin ningun prueba cu J.I. y G.M. tabata sa cu tin droga scondi den e motor. E abogado ta haya cu mester declara J.I. y G.M. liber.
Hues a cera tratamento di e caso y a bisa cu dia 11 Augustus 2025 lo tin sentencia.
