Riba dialuna mainta, 22 di juni 2026, mas di 600 mucha di scolnan primario di henter Aruba lo subi escenario na Renaissance Convention Center pa e Concierto di Fin di Ana anual di Leerorkest Aruba.
E concierto aki ta marca e culminacion di un ana di educacion musical, trabao den ekipo y desaroyo personal. Alumnonan di diferente scol lo presenta un programa musical varia, unda nan lo demostra e progreso cu nan a logra a traves di e programa di Leerorkest Aruba.
Desde su fundacion na 2019, Leerorkest Aruba a brinda educacion musical gratis na cientonan di mucha rond di e isla. Via lesnan semanal durante ora di scol, programanan di After School Orchestra y educacion musical online, e muchanan ta haya e oportunidad pa discubri nan talento, edifica confiansa den nan mes y desaroya habilidadnan importante pa bida a traves di musica.
E concierto di e ana aki lo conta cu presentacion di alumnonan di Klas 3 te cu Klas 6, como tambe di e After School Orchestra. E programa ta inclui un variedad di seleccion musical internacional, caribense y local.
E director di orkesta invita specialmente for di Hulanda, Patrick de Heus, lo dirigi e orkesta durante e concierto. Patrick tin un amplio experiencia trahando cu musiconan moho via e programa di Leerorkest na Hulanda, y e a pasa e siman aki ta ensaya cu e alumnonan como preparacion pa e evento special aki.
E concierto aki no lo tabata posible sin e dedicacion di e maestronan di musica, ekiponan di scol, boluntarionan, mayornan, sponsor- y partnernan cu ta sigui duna apoyo na e mision di Leerorkest Aruba.
Segun coordinador Juliette van Romondt, e concierto ta bay hopi mas aya di musica unicamente.
“Cada mucha merece e oportunidad pa discubri su talentonan y experencia exito. A traves di musica, e muchanan ta siña confiansa, disciplina, trabao den ekipo y perseverancia. E concierto aki ta un celebracion di tur loke nan a logra durante e ana.”
E evento lo tuma luga riba:
- Fecha: Dialuna, 22 di juni 2026
- Luga: Renaissance Convention Center
- Orario: 9:00 AM – 12:00 PM
Pa mas informacion tocante Leerorkest Aruba, por fabor bishita: www.leerorkestaruba.org
Tocante Leerorkest Aruba
Leerorkest Aruba ta un programa educacional di musica sin fines de lucro cu ta brinda lesnan gratis di instrumento musical na mucha rond di Aruba. Inspira pa e modelo exitoso di Leerorkest na Hulanda, e programa tin como meta pa haci educacion musical accesibel pa cada mucha, sin importa nan origen of situacion financiero.
