Pueblo di Aruba a respalda e accion di limpiesa grandemente tur rond nos isla. For di inicio di e proyecto di Baki den Bario a mira e nececidad cu tabatin pa deshaci di desperdicio tanto recidencial como comercial.
A forma partnernan strategico, City Inspector, Serlimar, Ecotech, Fundacion pa nos Comunidad, Ministerio di Turismo, ATA y awe ta mira atras riba un iniciativa cu a resulta den un exito rotundo pa locual ta limpiesa di nos isla. Den tur cas, bario, scol, club, compania por a mira con a sostene e accionnan aki den diferente bario y cu awe ta finalisa den area di Barcadera cu e ultimo Baki den Bario pa 2025.
E edicion aki a kibra tur record y espectativa, ta locual cu Prome Minister Mike Eman a expresa awe mainta durante momento cu prensa na Barcadera. For di ora tempran di mainta a presenta ciudadano cu nan pickup den fila pa asina deshaci di nan desperdicio y yuda tene nos isla limpi. Manera semper e team presenta ta bon prepara, tur cos a marcha den bon coordinacion y cada desperdicio a bay nan baki asigna.
Un palabra di gradicimento na Jean Pierre Gomez, cu a pone e tereno disponible pa asina e accion di Baki den Bario por a tuma luga, como tambe na Timmy Faro cu a encarga di mobilisa e contairnenan for di riba e area y cu asina ey e espacio a keda liber pa e accion di Baki den Bario. Aplauso grandi a bay tambe na tur miembro di prensa cu a compaña cada edicion di Baki den Bario, presente den ora hopi tempran di mainta y a contribui na e exito rotundo di cada accion di Baki den Bario.
E compromiso pa un isla limpi y dushi pa biba riba dje ta punto principal tras di cada edicion, tin di menciona cu esfuerso aki a hiba na total 447 baki di Ecotech, 14 baki di taira, incluyendo baki full yen di carton, un baki di 696 ton di bulk cu a carga cu sushi mixto.
Pa locual ta trata green waste, e yega na 70.5 ton / 56 baki di desperdicio berde (mata), y 20 ton di taira cu a logra deshaci di dje
Total pa locual ta trata e accion di Baki den bario, esaki a mira:
- Mas cu 4000 vehiculo
- Mas cu 800 ton di sushi
- Mas cu 500 baki
- 10 Baki den Bario pa 2025
Prome Minister Mike Eman sumamente satisfecho cu e acogida di e accion di limpiesa aki rond nos isla, gradecido na tur cu a acepta e invitacion, a uni na e esfuerso y a deposita nan desperdicio na un of otro accion den nan bario.
Proximo aña lo inicia cu localidad fiho pa deshaci di desperdicio, manera indica den diferente rueda di prensa, intencion di gobierno ta pa ubica seis puntro strategico ront nos isla, cu baki permanente y asina brinda e comunidad e oportunidad di haci uzo di e bakinan aki na momento cu ta necesario. Nan lo ta disponibel 24/7 y sin gasto alguno!
