E amor y fieldad di Dios pa nos nunca lo caba, pasobra Señor su fieldad ta eterno y berdadero.
Grandi y maraviyoso ta e fieldad di nos Dios, pasobra aunke nos ta infiel, Dios ta keda fiel.
Cada rebeldia, kehamento, y murmuracion, cu sali for di boca di hende ta demostra infieldad na Dios, cada biaha cu hende ta atende cu adoracion di imagen, ta demostra infieldad na Dios, cada biaha cu hende ta halsa hende enbes di pone nan bista riba Dios ta infieldad na Dios.
Cada cos den nos bida cu nos ta duna mas atencion cu Dios, ta idolatria y infieldad na Dios, pasobra Dios ta bini na prome lugar, E ta nos prome amor, y den tur cos nos tin di bolbe bek serca Dios.
Dios conoce nos tur di paden y pafo, ningun hende no por gaña Dios, Dios conoce nos salida y nos entrada, no tin nada den nos bida cu ta scondi pa Dios, dilanti di Dios ningun hende tin bida priva.
Dios a forma nos cada un den barica di nos mama, Dios sa exactamente cuanto cabey tin riba nos cabes, y aunke nos ta cana for di boluntad di Dios, toch Dios ta permanece fiel y e ta cuida nos.
Pesey nos tur sa cu ta yega e momento cu tur rudia mester dobla y tur lenga mester confesa cu Hesus Cristo ta Señor pa Gloria di Dios Tata.
Ta Dios ta esun cu ta cuida nos yuinan, ora nan drenta avion pa bay studia, ta solamente den Dios nos por pone e confiansa, cu tur cos ta bon aunke nos no ta mira e muchanan.Ta den e fieldad di Dios nos tur ta confia, pasobra nos tur sa cu Su fieldad tey semper.
Bo ta grandi den conseho, y poderoso den hecho,pasobra bo wowo ta habri pa tur e camindanan di e yuinan di hende,pa recompensa cada un segun su conducta,y segun e fruta di su hechonan, (Jeremias 32:19).
Pa loke ta Dios, Su caminda ta perfecto,e Palabra di Señor ta proba, E ta un escudo, pa tur esnan cu ta tuma refugio den dj’E.Pasobra ken ta Dios, si no ta Señor, y ken ta un baranca si no ta nos Dios.(Salmo 18:30-31).
Esun cu no a spaar ni Su mes Yiu,ma a entrega E pa nos tur,lo E lo no duna nos. Tur, tur cos tambe hunto cun’E.( Romanonan 8:32).
Anto Señor sa con rescata e santonan for di tentacion, y con pa tene e inhustonan bao di castigo,pa e dia di huicio (2 Pedro 2:9-10). Especialmente esnan cu ta sigi e carni den su deseonan corupto y ta despresia autoridad.
Laga nos tene bon cuenta cu tur bon conseho ta bini di Dios, y no lubida cu e ladron a bini pa solamente horta , mata y destrui.Cada biaha cu nos ta tuma decisionnan sin tene cuenta cu Dios, nos ta infiel na Dios, pasobra Dios ta den tur cos mescos cu sanger ta corre den henter nos curpa, Dios ta nos rosea.
Den esaki amor ta consisti,no cu ta nos a stima Dios, ma cu ta E a stima nos y a manda Su Yiu, pa e por ta propisiacion pa nos picanan. Ningun hende no a mira Dios nunca ,si nos stima otro Dios ta permanece den nos, y Su amor ta wordo haci perfecto den nos. ( 1 Juan 4:10-12).
Senor ta bon,un lugar fortifica den e dia di angustia y E conoce esnan cu ta tuma refugio den dj’E.
( Nahum 1;7).
Sinceramente, Pastor Marcel Balootje.
