Departamento di Agricultura, Cría y Pesca Santa Rosa semper ta crea tur posibilidad existente pa por duna e mihor posibel pa yuda nos productornan local. Tin ora sondea posibilidadnan cu kisas ta mustra poco no realisabel pero toch na final e resultado ta uno positivo.
Na momento cubo ta desea di bai cuminsa cu un cultivo sea ta den escala grandi of chikito e importancia di tur esaki ta awa. Sin awa no tin bida. Awa ta caro tambe. Por bisa tambe toch for di oktober 2024 pa awo februari 2025 ainda rato rato awa ta yobe cual ta hasi cu nos productornan sigur ta contento cu e poco yobida sporadico cu nos ta hayando. Pesey den comunicadonan anterior Departamento di Agricultura, Cria y Pesca Santa Rosa duna varios idea pa colectamento di awa. Sea bo ta recicla cierto awa manera di washmashine, awa di airco of awa colecta di yobida. Pa un di esakinan por ta mas efectivo bo mester di regenbak, barinan di plastic of tankinan blanco di 1000ltr conocí tambe como IBC Tote (Intermediante Bulk Container).
Den un estrecho cooperación Departamento di Agricultura, Cria y Pesca, Santa Rosa hunto cu WEB Aruba NV ya pa algún tempo caba tin e palabracion cu na momento cu WEB Aruba NV tin e tankinan aki disponibel nos departamento lo hayanan pa por repartinan cu nos productornan local cu ta inscribí aki na Santa Rosa. Ta un MOU (Memorandum Of Understanding) firma na aña 2023 entre gobierno di Aruba/Santa Rosa y WEB Aruba NV e tempo ey.
Esnan cu haya caba e tankinan aki nos tin registra y nos lo bai tuma contacto cu esnan cu falta ainda pa haya. Cada productor ta yega na remarke pa haya dos di e tankinan aki. Dunando oportunidad pa mas hopi productor por haya e tankinan aki pa por alivia maske ta un poco na colectamento di awa y hasi nan trabou poco mas fasil. Na momento cu nos tin tur cos regla nos lo cuminsa cu repartimento na esnan cu ainda no a haya. Claro no ta tur cu falta ta haya, pero si según cu nos ta disponi esakinan for di WEB Aruba NV nos lo reparti nan.
Departamento di Agricultura, Cria y Pasca Santa Rosa un biaha mas ta gradici gerencia di WEB Aruba NV pa e bunita gesto aki contrubiendo cu nos departamento y nos productornan local por haya e tankinan aki disponibel pa nan uzo.
