Otro grupo di tata pa aña 2026 a participa na Best Dad Ever y a termina Best Dad Ever cu un certificado. Entre 18 di augustus y 3 di september un grupo di tata a participa na shete sesion. Durante e sesionan, nan a siña tocante educacion di mucha, comparti experiencia y sostene otro.
Involucracion di tata den bida di un yiu ta sumamente importante. Estudio ta mustra cu envolvimento di tata ta esencial pa desaroyo di mucha. Muchanan cu nan tata ta ausente den nan bida tin mas riesgo di haña problema na scol, internalisa comportacion problematico, ta experiencia problema cu nan salud mental, tin mas chens di ta asocia cu amistadnan menos bon, ta expone mas comportacion criminal etcétera etcetera.
Best Dad Ever ta un proyecto caminda cu, durante shete sesion tatanan y futuro tatanan ta traha ariba nan habilidadnan pa ta un mihor tata di locual cu nan ta caba. Best Dad Ever ta stimula e participacion di hende homber den educacion di nan yiunan. E tatanan ta ricibi informacion, conocemento y tips con nan por ta mas involucra den bida di nan yiu y pakico esaki ta importante.
Estudio haci na Aruba a mustra cu e relacion entre tata y yiu na Aruba lo ta zwak. Esaki a pone cu 131 a laga haci un estudio mas profundo na aña 2016 pa asina aki haya un mihor bista di kico tatanan ta pensa di nan rol den educacion di nan yiunan. Un di e resultadonan di e estudio ta cu tatanan kier ta mas involucra den educacion di nan yiunan. Debi na esaki 131 a crea Best Dad Ever na 2016 y a cuminsa cu implementacion di Best Dad Ever na 2017.
Algun temanan cu ta ser trata durante e sesionan ta por ehempel: impacto di un tata, planea famia, duna cuido, violencia etcetera etcetera. Hunto cu 131, Famia Planea tambe tin un rol importante durante un di e sesionan.
Best Dad Ever por tuma lugar danki na sosten di Setar N.V, Aruba Airport Authority N.V., The Salamander Group, Web Aruba N.V, Aruba Hotel and Tourism Association y ASTEC N.V.. Tambe 131 kier a gradici CEDEHM pa e cooperacion.
Den luna di october venidero e ultimo grupo di Best Dad Ever pa aña 2026 lo cuminsa. Pa mas informacion tocante Best Dad Ever por tuma contacto via nos website: 131.aw, Instagram: Instagram: 131aruba, facebook: https://www.facebook.com/aruba.131, email: 131aruba@gmail.com of telefon 5886138/ 5884011.
