E homber masagista C., ta wordo haya culpabel di viola un dama durante masashi. Esey ta e decision di Hues, den e caso penal cu Ministerio Publico a cuminsa contra C.
SOLO DI PUEBLO por a compronde cu C. a admiti di a penetra cu su dede den e parti intimo di e dama M. Hues no solamente a conden’e na castigo di prison, sino tambe cu pa 5 aña largo e no por haci trabao di masagista.
Tratamento di e caso a sosode luna pasa, caminda e acusado C. a admiti di a penetra e dama M. cu su dede riba 16 April 2025, durante cu e tabata haci masashi. Ta asina cu Fiscal a exigi 3 aña di prison.
SENTENCIA
Hues a mustra cu e dama M. a declara cu durante cu C. tabata dun’e masashi, inespera C., a hinca dede den su parti intimo. E dama a keda sorprendi y no por a haci nada. Hues ta haya cu esaki, segun ley penal, ta wordo considera cu C. a forza e dama. Hues a sigui bisa cu segun e acusado C., el a sinti disponibilidad di e dama y pesey a haci’e. Na opinion di Hues, e dama M. ningun momento a duna C. permiso pa haci esey. Hues ta haya cu C. ta culpabel di a viola e dama. Hues a sigui bisa cu e acusado C. a abusa di e confianza cu e dama tabatin den C.
CASTIGO
Hues a bisa cu tabatin penetracion di dede pero no tabatin violencia fisico. Sinembargo, e ta keda un caso serio pero segun hurisprudencia, door cu no tabatin violencia fisico, e castigo ta menos.
Hues a condena C. na 3 aña di prison di cual 1 aña ta condicional cu 2 aña di prueba. Ademas Hues a prohibi C. pa eherce su profesion pa 5 aña.
Ta asina cu e dama M. a haci demanda di daño. Hues a declara e demanda material no admisibel. Pa e demanda inmaterial cu ta 35 mil florin, Hues ta haya cu e dama no a argumenta esey suficiente. Sinembargo Hues ta haya cu e dama merece haya pago pa daño inmaterial y a condena C. na paga 5 mil florin. Hues a pone tambe e medida di pago. Esey ta nifica cu si C. keda sin paga, e lo mester bay 60 dia cera.
